चुम्बक थेंज्याःम्ह ग्वाःचा

शिला साय्मि

उगु इलय् 'ग्वाःचा' धाल कि म्हमसिउम्ह सुं दइ मखु। वास्तविक नां गोपाल श्रेष्ठ खःसां मनूतय्सं वय्कःयात 'ग्वाःचा' धकाः म्हसिउ। दु। वय्कः गोलकिपर आरसीटी टिमयाम्ह खःसां प्रेरणाया स्रोत धाःसा फुक्क हे फुटबल कासामितय् खः। वय्कलं नीनिदँ आरसीटीया गोलकिपर जुयाः म्हितादिल। वय्कः छम्ह राष्ट्रिय खेलाडीयालिसें देय्या दकलय् लोकं ह्वाःपिं गोलकिपरत मध्ये नं छम्ह खः। वय्कःया नां बेस्ट गोल किपरय् नं सिफारिस जूगु खः। तर दथुइ मेगु हे कासा जुयाः उपाधि मेम्हेसित हे बिल।
मां कान्छी श्रेष्ठ व बौ दुर्गालाल श्रेष्ठया कोखं २०१४ साल भाद्र १८ गते जन्म जूम्ह वय्कःया ध्यान मचांनिसें हे फुटबलय् दुगु खः। वय्कःयात मचाबलय् बल छगः दत कि मेपिं सुं हे म्वाः। थः मम्हितूसां मेमेपिं म्हितूगु नं वय्कलं तसकं ध्यान बियाः स्वयाच्वनीगु ।

झिंन्यादँया बैशय् वय्कलं उगु ईया नांजाःगु फुटबल टिम आरसीटी या गोलकिपर जुयाः म्हितादीगु खः। वय्कःयात मेमेगु टिमतय्सं नं थःथाय् साला कायेगु कुतः मयाःगु मखु तर वय्कलं थःगु टिमयात गुबलें विश्वास घात यानामदी।
थःत फुटबल कासामि जुइत प्रेरणा बियादीपिं कथं वय्कलं न्ह्याबलें निम्ह मनूया नां कयादी, छम्ह थःहे तता बिमला श्रेष्ठ व मेम्ह गुरु विष्णुगोपाल श्रेष्ठ। फुटबलय् तसकं रुचि दुगु खनाः ततां चीनं वय्कःयात धकाः बल छगः न्यानाः हयाबिउगु जुयाच्वन। वहे बल ज्वनाः वय्कः न्हिंन्हिं तिंख्यलय् म्हितीगु। अन हे आरसीटीया कासामित नं अभ्यास याःवयाच्वनीगु । विष्णुगोपालं छक्वः वय्कःयात गोलकिपर तयाः म्हितूगु जुयाच्वन। वय्कः नं मचा हे जूसां विष्णुगोपालं गथे गथे यात अथे हे याइगु। वय्कःया म्हितीगु शैली, खेल प्रतिया लगाब खनाः विष्णुगोपाल श्रेष्ठं वय्कःयात थःगु टिमया निंतिं प्रशिक्षण बीगु शुरु यात। क्लबं म्हिते खनाः वय्कः तसकं लय्ताः। कासा त्याकाः वयेबलय् पासापिं व स्वकुमितय्सं बीगु सम्मान हे वय्कःया निंतिं तःधंगु हौसला जुल ।

कासाय् वय्कः अब्बल खःसां शिक्षाय् धाःसा वय्कःया उलि ध्यान मवं। उकिसनं छ्रन्हु नियम विपरित म्हितूम्हेसित प्रोटेष्ट यायेगु खँय् तं चायाः स्कूलं वय्कःयात बियातःगु छात्रवृत्ति नं दिका बिल। थनं लिपा वय्कःया औपचारिक शिक्षा नं त्वःफित ।

वय्कलं कासा जक म्हिताः आपालं हे सम्मान व सिरपाः त्याकादी धुंकूगु दु। २०३५ सालय् वय्कलं दकलय् न्हापां नर ट्रफी काठमाडौं कासाय् न्हाप जुयाः पदक त्याकादीगु खः। अथे हे २०३६ सालय् शहीद स्मारक लीग, २०३७ सालय् एन्फा कप, २०३९ सालय् राष्ट्रिय लिग लगायत आपालं कासाय् वय्कलं न्हाप सिरपाः त्याकादीगु दु ।

उलिमछि पदकत त्याकादीगु दुसां २०३७ सालय् एन्फा कप त्याकेत जूगु कासा वय्कलं आः तक ल्वःमंके मफु। कासाय् न्हाप जूगुलिं वय्कःयात मदुम्ह जुजु वीरेन्द्रं लुँयागु पदक लःल्हानादीगु खः। वय्कःया उत्कृष्ट खेलया कदर यासें शिक्षा तथा संस्कृति मन्त्रालयं वय्कःया थीथी पोजय् म्हिताच्वंगु किपा सहितया क्यालेन्डर नं पिकाःगु खः।
फुटबल म्हितेगु झ्वलय् वय्कलं आपालं देय्या भ्रमण यायेगु अवसर नं चूलाकादीगु दु। बंगलादेश, भारत, पाकिस्तान, ओमान, रुस, मलेसिया, कोरिया आदि देशय् वय्कः थ्यनेधुंकल। न्ह्यागु देशय् थ्यंसां अन थःगु छाप त्वःतेत वय्कः सफल जुयादी। सन् १९९० स बंगलादेशय् जूगु वर्ल्ड कप क्वालिफाइङ्ग गेम लुमंकादी। उगु कासाय् ९० मिनेट तक नं कोरियनतय्त गोल याके मबियागु अनुभव वय्कःयाके अझ नं ताजा हे तिनि। अथे हे इराननाप जूगु कासाय् गेम हे त्वःताः पिहां वये माय्क छ्यनय् प्यंकाः घाःपाः याना बिउगु घटना नं वय्कलं ल्वःमंके मफु ।

फुटबलया की हे खयां नं छेँया परिस्थितिं यानाः धाःसा वय्कलं जागिर नयेमाःगु अवस्था वल। ०३३ सालय् वय्कलं जागिर नयादिल। ०४७ सालय् मां तसकं म्हं मफुसेंलि फुटबलयात सदांया लागिं त्याग यायेमाल। थौंकन्हय् वय्कः सांस्कृतिक संस्थान अन्तर्गत राष्ट्रिय नाचघरय् टेक्निकल चीफ जुयाः ज्या याना च्वनादीगु दु ।

वय्कलं म्हितादीगु इलय् आरसीटी धाल कि तसकं बांलाःगु टीम खः। टीम वर्क बांलाः। इलय् ब्यलय् क्याम्प तये यंकी। कासामितय्त अय्लाःथ्वँ, चुरोस ला थीके हे बी मखु। उबलय् क्लबयाके ध्यबा मदु, अय् जूगुलिं न्ह्यागुं चन्दा उठे यानाः चले यायेमाः। थौंकन्हय् स्थिति हिलेधुंकल। आरसीटी क्लबया थःगु हे छँे दु। तर म्हितीपिंके उत्साह खने मदु। १०-१५ दँ दुपिं त्वाःया मस्तय्त इमान्दारपिं प्रशिक्षकतय्सं प्रशिक्षण बिल धाःसा टीमयात हानं थकायेफु ।

थौंकन्हय् नेपाल फुटबल संघया नायः गणेश थापां नेपाःया फुटबल विकासया लागिं यानाच्वंगु ज्यापाखें थः सन्तुष्ट जुयागु खँ वय्कलं कनादी। 'सी न्ह्यः नेपाः वर्ल्ड कपय् वंगु स्वये दःसा जिउ' वय्कःया इच्छा ।

More Stories Like this