प्रचण्डया यात्रां दिल्ली सशंकित

विकास निर्माण कार्यक्रमय् विकास विरोधी नेता छाय्? / 'टाइम्स अफ इण्डिया'या टिप्पणी

येँ (सन्ध्या टाइम्स)/माओवादी अध्यक्ष प्रचण्डं थनिंनिसें यायेत्यंगु मलेशिया भ्रमण व वयां लिपा यायेत्यंगु चीन भ्रमणं भारतया कपाः स्याका हःगु संकेत वःगु दु। वय्कःया थ्व भ्रमणयात कयाः भारतीय न्हिपौ 'दी टाइम्स अफ इण्डिया'या अनलाइन संस्करणय् यानातःगु छगू टिप्पणीपाखें थ्व संकेत प्राप्त जूगु खः ।

उकी धयातः कथं भाजु प्रचण्ड मलेशियाया राजधानी क्वालालम्पुरय् जुइगु छगू विकास मामिला सम्बन्धी सम्मेलनय् ब्वति कायेत उखे झायेत्यंगु खः। सरकारय् मदुगु पार्टीया अध्यक्षं विकास सम्बन्धी सम्मेलनय् ब्वति कायेगु ज्यायात उकी हास्यास्पद खः धयातःगु दु। उकी धयातःगु दु, 'थःगु देशय् जुइगु आपालं विकास सम्बन्धी परियोजनाय् माओवादीं पंगः थनाच्वंगु दु। थ्व परियोजनातय्सं नेपाःया विकासय् यक्व हे ग्वाहालि याइगु खः। आः वहे पार्टीया नेता विकास सम्बन्धी सम्मेलनय् ब्वति कायेत पिहां वनाच्वन।' माओवादीं थौंकन्हय् पंगः थनाच्वंगु १३ गू जलस्रोत सम्बधी परियोजना मध्ये ११ गू भारतीय खः धकाः नं पत्रिकाय् धयातःगु दु ।

देशय् थ्वहे अक्टोबर १ निसें शान्ति प्रक्रियायात निरन्तरता बीगु धकाः उकुन्हु तिनि प्रचण्डं सही याःगु खँ लुमंकुसें अनलाइनय् तर आः उगु सम्झौता लागू यायेगु न्हि कुन्हु धाःसा वय्कः देशं पिने लाइगु जुयाच्वंगु दु धकाः नं धयातःगु दु। देशय् माओवादीं यानाः हे प्रधानमन्त्रीया चुनाव यायेमाःगु अवस्था वःगु खः धासें च्यागूगु चरणया चुनाव लिपा गुंगूगु चुनावय् धाःसा वय्कः थःहे नेपाः मदइगु जुयाच्वन धकाः नं टिप्पणी यानातःगु दु ।

लिसें उकी भाजु प्रचण्डया चीन भ्रमणयात नं शंका यानाः स्वयातःगु दु। देशय् प्रधानमन्त्रीया चुनाव जुयाच्वंगु इलय् चीनं ५० करोड दां झिके यायेगु धकाः जूगु खँल्हाबल्हा सार्वजनिक जूगु सन्दर्भलिसे स्वानाः भारतं प्रचण्डया चीन भ्रमणयात स्वयाच्वंगु दु ।

उकी धयातः कथं सन् २००८ लिपा भाजु प्रचण्डया थ्व प्यक्वःगु भ्रमण खः। थुगुसी भाजु प्रचण्डयात चिनियाँ सरकारं हे अन जुयाच्वंगु सांघाई एक्स्पो २०१० या समापन ज्याझ्वलय् संवोधन यायेत सःतूगु खः। उगु ज्याझ्वलय् संवोधन यायेत चीनं विश्वया थीथी देय्या च्याम्ह व्यक्तित्वयात सःतूगु खःसा प्रचण्ड उकी मध्ये छम्ह खः। तर टाइम्स अफ इण्डियां धाःसा चीनं अतिकं विशिष्ट व्यक्तित्व धकाः सःतूसां थःगु देशय् आन्तरिक समस्या पिहां वःगु त्वह तयाः फ्रान्सया राष्ट्रपति निकोलस सार्कोजीं थःगु चीन भ्रमण रद्द याःगु प्रशंग उल्लेख यासें थःगु देशय् सरकार दयेके मफयाच्वंगु संकटपूर्ण इलय् प्रचण्ड चीनपाखे वनेगुया औचित्य छु धकाः न्ह्यसः तया हःगु दु ।

उखे छुं मनूतय्सं भाजु प्रचण्ड देशय् वयाच्वंगु तःधंगु नखः मोहनि छले यायेत विदेश वनेत्यंगु खः धकाः नं टिप्पणी याना हःगु दु ।