कांग्रेसया चुनावं बिउगु संकेत

नकतिनि क्वचाःगु नेपाली कांग्रेसया महाधिवेशनया सम्पूर्ण लिच्वः पिहां वःगु दु। थुकी सभापति सुशील कोइरालाया मनूत अप्वः त्याना वःसां कोइरालाया प्रमुख प्रतिद्वन्द्वी जुयादीम्ह शेरबहादुर देउवां थःगु सशक्त उपस्थिति क्यनादीगु दु। भोटिंग हे यानाः निर्णय यायेमाःगु अवस्थाय् बाहेक कांग्रेसया छुं नं विषयय् देउवायात याकःचा छखे लाकाः कोइराला याकःचां छुं याये मफइगु स्पष्ट किपा थुकिं क्यना बिउगु दु। धायेत ला थुकियात एकताया महाधिवेशन धायेगु याः। तर चुनावया लिच्वः स्वयेबलय् कांग्रेस व प्रजातान्त्रिक कांग्रेस एकीकरण यानातःगु भू धाःसा स्पष्ट रुपं हे सी दया बिउगु दु। कोइराला व देउवाया बराबर भोटं कांग्रेस अझ नं निगू पार्टी छथासं दनाच्वंगु दुवाः जक खः धइगु खँ नं क्यना बिउगु दु। थुकिं कोइरालायात तसकं संयम व सन्तुलित जुयाः पार्टी न्ह्याकेमाःगु हाथ्या वया बिउगु सीदु ।

चुनावया लिच्वः अप्वः ल्याय्म्ह नेतातय् पक्षय् वंगु दु। दकलय् क्वकालिम्ह उम्मेदरवार गगन थापा दकलय् अप्वः मत हयाः त्याःगु अवस्थां बिउगु सन्देश पार्टीया बुरा नेतातय्सं बांलाक हे थुइकेमाः। कांग्रेस वास्तवय् धाथें हे न्हूगु सोच व न्हूगु धार ज्वनाः न्ह्याः वनेत तयार जुयाच्वंगु संकेत थुकिं बिउगु दु। यदि चुनावं बिउगु थ्व लिच्वःयात वेवास्ता यानाः पार्टी न्ह्याः वन धाःसा उकिं हानं नं पुलांगु हे दुर्घटनायात लित हयेफुगु खतरायात नं ध्यान तयेमाः। निगुलिं खेमाया बराबर धइथें दुजःत त्याःगुलिं शक्ति सन्तुलन कायम यायेत थाकुइगु नं उतिकं स्थिति दु। थ्व शक्तियात नेतातय्सं थवंथवय् क्यनेत मखु पार्टीयात गतिशील दयेकेत प्रयोग याःसा बांलाइ ।

More Stories Like this