दवाव बीत सभासदतय् बैठक

येँ (सन्ध्या टाइम्स)/म्याद थप यानाः नं क्वःछिनातःगु इलय् न्हूगु संविधान दयेके मफइगु अवस्था ब्वलनावःगु तायेकाः स्वयं सभासद्तय्सं हे आः थीथी दलया शीर्ष नेतातय्त दवाव बीगु नितिं सभासद्तय्गु जक ब्यागलं बैठक च्वनेत्यंगु दु ।

एमाले व मेमेगु दलया ल्याय्म्हपिं सभासदतय्गु कुतलं संविधानसभाय् दुथ्याःगु नीन्हय्गुलिं हे दलया सभासदतय्गु बैठक थौं सःतूगु दु ।

शीर्ष नेतात बिना जुइगु उगु बैठकय् क्वःछिनातःगु इलय् न्हूगु संविधान दयेकेगु ज्या सभासदपिनिगु जूगुलिं आः दलया शीर्ष नेतातय्त उखेपाखे ध्यान सालेत गुकथं दवाव बीगु अले सभासदतय्सं छु भूमिका म्हितेगु धइगु खँय् सहलह जुइ धाःगु दु। सिंहदरवारदुने पुलांगु संसद भवनय् च्वनीगु उगु मुँज्याया बारे एमालेया सभासद् रविन्द्र अधिकारीं 'सन्ध्या टाइम्स'लिसे खँ ल्हासें धयादिल, 'न्हूगु संविधान इलय् हे दयेकेत, नेतातय्त संविधान निर्माणया नितिं माःगु कथं दवाव बीत, सभासदतय्गु भूमिकाया विषयय् सहलह ब्याकेत थ्व बैठक सःतागु खः। थ्व जिमिगु न्हापांगु कुतः खः। जिमिसं माओवादी, कांग्रेस, एमाले, फोरम, तमलोपा, फोरम लोकतान्त्रिक, सदभावना, नेपाः पार्टी, नेकपा माले, नेमकिपा, राजमो, राप्रपा नापं २७ दलया हे सभासदतय्त सःतागु दु ।'

सूत्रं बिउगु जानकारी कथं विशेष यानाः सभासदतय्गु ब्यागलं बैठक च्वनेगुली एमालेया नेतात नापं सभासद्पिं सक्रिय जूगु खने दु ।

प्रधानमन्त्री माधव नेपालया सरकारयात ताः ई न्ह्यःनिसें पार्टीइ दुने च्वनाः विरोध याना वयाच्वंपिं सभासदतय्सं एकीकृत माओवादी, नेपाली कांग्रेस व एमाले नापं मेमेगु दलया शीर्ष नेतातय्त दबाब बीगु निंतिं हे थौं थ्व बैठक च्वनेगु ज्याझ्वः दयेकातःगु खः। थौंकन्हय् संविधान मदयेकू धकाः सभासद्तय्त आलोचना याना हयाच्वंगु दु ।