छम्ह मनूया कारणं जुयाच्वंगु नाटक

न्हय्क्वःगु चरणया चुनाव लिपा च्याक्वःगु चरणया चुनावं नं प्रधानमन्त्री ल्यये मफयेवं आः थ्व तमाशा गबलय् तक जारी यायेगु धकाः प्यखेरं न्ह्यसःचिं पिहां वःगु दु। खास यानाः प्रधानमन्त्रीया चुनावय् उम्मेदवार जुयाच्वंम्ह प्रचण्डं थःगु नां लित कायेवं मैदानय् रामचन्द्र पौडेल याकःचा हे ल्यं दनि। अय् जुयाः आः पौडेलं नं नां लित कयाः सहमतिया आधारय् प्रम ल्ययेगु ज्या याःसा जिउ धइगु बिचाः राजनीतिक ख्यलय् पिहां वयाच्वंगु दु। पौडेल याकःचा चुनावी मैदानय् ब्वाँय् जुयाच्वंगु बांलाः नं मजू। थुकिं वय्कःयात राजनीतिक हास्यया पात्र जक दयेका बिउगु दु। त्याकेगु लागिं बहुमत मदु व चुनाव जुक्वपतिकं बुइ धइगु सीक सीकं नं वय्कः चुनावी मैदानय् ब्वाँय् जुयाच्वंगुलिं थुकिं वय्कःया राजनीतिक छबी दयेकेगु स्वयां अप्वः स्यना वनाच्वंगु दु। वय्कः याकःचिया कारणं देय्या सर्वोच्च निकाय संसदया ई व स्रोत सितिकं वनाच्वंगु दु। उकिं आः थज्याःगु प्रक्रियाय् वनेगु पलेसा सहमति हे दयेकाः वनेगुपाखे कुतः जुइमाःगु खनेदु। सहमतिया लागिं छुं छुं खँ माओवादीं त्वःतेमालीसा छुं छुं खँ कांग्रेसं नं त्वःतेमाली। त्वःतेगु लागिं तयार मजुइगु खःसा सहमति सम्भव मदु। नेपाली राजनीतिक पार्टीया नेतातय्के कायेगु बाहेक त्वःतेगु धइगु संस्कार हे मदुगु कारणं यानाः सहमति थेंज्याःगु 'गिभ एण्ड टेक' या प्रथा हे दुहां वये मफयाच्वंगु दु। आः हानं नं पौडेल याकःचा हे प्रधानमन्त्रीया कासाय् ब्वाँय् वनाः चुनाव यानाच्वनेगु खःसा थुकिं जनतायात अझ हे आक्रोशित यानाः थ्व व्यवस्था हे वास्तवय् बेकार खः धकाः सन्देश बीगु ज्या जक याइ ।

More Stories Like this