न्हिलाःन्हिलाः ख्याः

ज्याझ्वया अन्त्यय् सहभागीतय्त आम्लि, ख्येँ, लालमोहन व लाखामरि थेंज्याःगु न्ह्यइपुगु सिरपाः डोरप्राइज कथं बिउगु दु ।

वंगु शनिबाः नेपाल पर्यटन बोर्डया भवनय् सांस्कृतिक एवं सांगीतिक कार्यक्रम सम्पन्न जुल। नेपाल पर्यटन बोर्डया प्रमुख प्रचण्डमान श्रेष्ठ मू पाहां कथं न्ह्याःगु उगु ज्याझ्वलय् गणेशराम लाछी सभानायः कथं उपस्थित जुयादीगु खःसां। अथे खःसां ज्याझ्वःया औपचारिक मूपाहां व सभापति धाःसा उपस्थित स्वकुमिपिंपाखें हे गोला प्रथां ल्यःगु खः। उकी मूपाहां सुरेश प्रधान ल्यःगु खः ।

ज्याझ्वलय् गायिका रत्नशोभा महर्जन, लसता जोशी, रीता महर्जनपिंसं म्येँ हालादीगु खःसा भिंतुना जोशीयालिसें सुरभी श्रेष्ठ व किकिम्पा सांस्कृतिक प्रतिष्ठान ख्वपपाखें देवेन्द्र बज्राचार्यया निर्देशनय् निपु हुला प्याखं नं क्यंगु खः। उगु पुचः हुलाप्याखनय् दिल सुवाल, उत्तम मानन्धर, लक्ष्मीप्रसाद बाटी, सर्मिला कोजू, करुणा राजोपाध्याय, सुलोचना प्रजापति, लक्ष्मी बखाद्यःपिंसं प्याखं हुलादीगु खः ।

लिसें विजय मानन्धर 'चिन्तित' या च्वसाय् 'साइड इफेक्ट' नांया ख्यालः क्यंगु खःसा उकी भिमसेन रिसाल, अन्नपूर्णेश्वरी श्रेष्ठ, एलिना शाक्य, राजेश श्रेष्ठ, हरिमान दिवाकर व लसता महर्जनं म्हितादीगु खः। अथे हे सुरेन्द्र मानन्धरं च्वयादीगु 'खिचायात हे मत्वःतू' नांया ख्यालः समय्बजि गुपं न्ह्यब्वःगु खःसा उकी सुरेन्द्र मानन्धर, रेवन्तलाल श्रेष्ठ, राजेन्द्र श्रेष्ठ व राजेश मालाकारं म्हितादीगु खः। अथे हे न्हूगु प्रयोग कथं 'आन्दोलन' नांगु संवाद हे मदुगु ख्यालः नं न्ह्यब्वःगु खः। उकिया परिकल्पना व निर्देशन सुशील राजोपाध्यायं यानादीगु खःसा पुरुषोत्तम राजभण्डारी, रवि डंगोल (बेइमान), सुनिता ठाकुर, नरोत्तम मानन्धर, हेमन्त प्रधान, बिनिता महर्जन व राम कपालीं म्हितादीगु खः ।

अथे हे उकी सानु ताम्राकार व सोनु श्रेष्ठं जादू शो क्यनादीगु खःसा रुपेन्द्र श्रेष्ठं प्यारोडी हालादीगु खः। रामकृष्ण खड्गीं ख्यालिखँ न्यंकादीगु खः ।

ज्याझ्वःया अन्त्यय् सहभागीतय्त आम्लि, ख्येँ, लालमोहन व लाखामरि थेंज्याःगु न्ह्यइपुगु सिरपाः डोरप्राइज कथं बिउगु दु। ख्यालिगुलु गुथिपाखें दँय्दसं सापारुया लसताय् थुकथंया ख्यालि ज्याझ्वः याना वयाच्वंगु दु ।

More Stories Like this