नेवाःपुचः दक्षिण कोरियां कासामिपिंत हन

नेपाःया कासा ख्यलय् योगदान यानादीपिं थीथी ११म्ह राष्ट्रिय कासामिपिंत छगू ज्याझ्वःया दथुइ दक्षिण कोरियाय् हनेज्या याःगु दु । नेवाः पुचः दक्षिण कोरियां वंगु सेप्टेम्बर २३ कुन्हु ग्वसाःग्वःगु ज्याझ्वलय् थ्व हनेज्या याःगु खः । कासामि अमन चित्रकारं त्वा:देवाय् मत च्याका उलेज्या यानादीगु ज्याझ्वलय् सजिव कृष्ण मुस्यानजुं लसकुस यानादीगु खः ।

मुक्कं नेवाः तजिलजि कथं हनेज्या जूगु उगु ज्याझ्वलय् बीबीसी साझा सवाल ज्याझ्व: न्ह्याकामि भाजु नारायण श्रेष्ठयात नं हनादीगु खँ पुचःया न्वकू रमेश श्रेष्ठ जानकारी बियादिल । येँया तःधंगु नखः इन्द्रजात्रायात लुमंकुसें समयबजि नयेगु ज्या नं जूगु उगु ज्याझ्वलय् पुचःया नायः गुरुज्यू नविन वज्राचार्यया सभापतित्वय् जूगु खः ।

पुचः हे ग्वसालय् छन्हु न्ह्यः २२ सेप्टेम्बरय् खोटाङ्ग सेवा समाजं सांस्कृतिक ज्याझ्व: नं न्ह्यब्वःगु खः । उगु ज्याझ्वलय् नेपाःया राजदूत कमल प्रसाद कोइराला, नेपाःया कलाकारपिं निम्बा रुम्बा, मौसमी गुरुङ्ग, सृजना विरही व पवनकलीया ल्हा:तं नेपाःया लुम्बिनीया प्रचारप्रसार व गैर आवासीय शाखा दक्षिण कोरियाय् नेपाल हाउसयात ग्वहालि जुइकथं चिठ्ठा नं चायेकूगु खः ।

More Stories Like this