येँया सुरक्षा व प्रहरीया खासा पलाः

देशय् मोहनि नखः न्ह्यःने वःलिसे खुँज्या, लुटपाट आदि थेंज्याःगु घटनात नं उतिकं हे अप्वया वइ, थ्व झीसं अनुभव हे यायेधुनागु खँ जुल। अय् जुयाः थुगुसी मोहनि न्ह्यः गज्याःगज्याःगु कथं लुटपाट, खुँज्या आदि आदि जुइफु धकाः स्थानीय जनतायात सचेत यायेगु ताः तयाः प्रहरीं छेँय् छेँय् हे वयाः जानकारी बीगु ज्याझ्वः न्ह्याकेत्यंगु समाचार वःगु दु। तर छखे प्रहरीं थज्याःगु तयारी तिनि यानाच्वंगु इलय् मेखे नगरय् धाःसा लुटपाटया घटनां आकाझाकां धइथें तीव्रता काःगु दु। थ्व झ्वलय् म्हिगः तिनि येँया रक्तकाली लागाय् ध्यबा ज्वनाः लँय् वयाच्वंम्ह छम्ह लँजुवाःयात लुटे यायेगु ज्या जुल। लुटेरातय्सं गोली समेत चले यानाः स्वंगू लाख तका दां ज्वनाः बिसिउँ वंगु जुयाच्वन। प्रहरी थ्यंकः वःगु इलय् तक लुटेरात तापाक बिसिउँ वनेधुंकल। अजूचायापुगु खँ ला छु धायेबलय् वंगु दत्याया दुने येँया थ्वहे दुवातय् पाय्छि थुकथं हे लखौं तका लुटपाट जूगु थ्व स्वक्वःखुसी खः। खास यानाः लखौं तका दां ज्वना वइपिं मनूतय्त तापाकं निसें पीछा यायां वयाः थ्व दुवातय् थ्यने सातकि लुटे याइगु जुयाच्वन। लिक्क गनं नं प्रहरी चौकी मदुगु जक मखु प्रहरी दुहां तकं मवइगु लागा व प्यखेरं गल्लिया गल्लि दुगु दुवाः जूगुलिं लुटे याइपिनि लागिं थ्व छगू 'गोल्डेन ट्राय्ङ्गल' जुयाच्वंगु दु। अज्याःगु थाय्या बारे अध्ययन यानाः प्रहरीं सुरक्षाया छपलाः तक हे मन्ह्याकूगु निश्चय नं दुर्भाग्य खः। मोहनिया झ्वलय् जक मखु, सदांया लागिं हे प्रहरी प्रशासनं स्वनिगःया थज्याःगु ग्यानापुगु दुवाःया निगरानी यानाः अन सुरक्षा अप्वयेकेमाःगु दु। मखुसा प्रहरीप्रति दुगु जनताया विश्वास पाचुक हे मदया वनी ।

More Stories Like this