बहुमत दलतपाखें 'नो भोट'
सहमतिया पंगः पौडेल जुइ मजिउ: प्रम
येँ (सन्ध्या टाइम्स)/व्यवस्थापिका संसदय् थौं सनिलय् जुइगु प्रधानमन्त्रीया च्याक्वःगु चुनावय् बहुमत दल व बहुमत सभासदपिंसं भोट मबिसे 'नो भोट' धकाः सुम्क च्वनीगु जूगु दु ।
एकीकृत माओवादी व एमाले दथुइ माओवादीपाखें प्रधानमन्त्रीया उम्मेदवार जुयाच्वंम्ह प्रचण्डया नां लित कायेगु नापं आःया चुनावी प्रक्रियाय् ब्वति मकायेगु धकाः सहमति जुइधुंकूगु नापं मेमेगु दलतलिसे नं सहलहलपाखें चुनावय् ब्वति मकायेगु धकाः खँ जूगुलिं बहुमत दल व बहुमत सभासदपिंसं थौं भोट मबीगु चिश्चित जूगु दु।
बहुमत सभासद्या भोट मदयेवं थौं नं प्रधानमन्त्री ल्यये मफइगु नं निश्चत दु ।
थ्व हे दथुइ एकीकृत माओवादी व एमालेपाखें नेपाली कांग्रेसयात नं थःगु उम्मेदवारी लित कयाः न्हूगु हे प्रक्रियां वनेत इनाप यानाच्वंगु दुसा कांग्रेसं धाःसा उम्मेदवारी लित काये न्ह्यः हे सहमति जूसा जक वने फइ, मखुसा आःया हे प्रक्रिया न्ह्यानाच्वनी धयाः औपचारिक रुपं वार्ता यानाच्वंगु मदु ।
थ्वहे झ्वलय् प्रधानमन्त्री माधवकुमार नेपालं नेपाली कांग्रेसया प्रधानमन्त्रीया उम्मेदवार रामचन्द्र पौडेलयात निकासया पंगः जुइ मजिउ धयादीगु दु ।
वय्कलं राष्ट्रिय सहमतिया नितिं कांग्रेसया नेता पौडेलं उम्मेदवारी लित कायेमाः धयादीगु खः। यलय् थौं जूगु समावेशी सम्बन्धी छगू ज्याझ्वलय् ब्वति कायेधुंकाः संचारकर्मीतलिसे खँल्हासें प्रधानमन्त्री नेपालं अथे धयादीगु खः ।
वय्कलं देय्यात निकास बीगु नितिं माओवादी व एमालें याःगु सहमतिइ नेपाली कांग्रेस नं सहभागी जुइमाः धयादीगु दु। प्रधानमन्त्री नेपालं कांग्रेस जक मखु मेमेगु दलत नं सहमतिइ वयाः राष्ट्रिय सहमतिया आधारय् देय्यात निकास बीमाः धकाः नं बः बियादीगु दु ।
