थौं जुइत्यंगु मेगु निरर्थक चुनाव

प्रधानमन्त्री ल्ययेगु लागिं संसदय् थौं च्यागूगु चरणया मतदान जुइत्यंगु दु। थ्व स्वयां न्ह्यः न्हय्क्वः तक जूगु मतदान विफल जूगुलिं थौं च्यागूगु चरणया मतदान जुइत्यंगु दु। थौं च्यागूगु चरण तकया मतदान थ्यंबलय् राजनीतिइ थीथी कथंया हिउपाः वयेधुंकूगु दु। मतदानपाखें आः छुं हे लिच्वः वइ मखुत धकाः चुनावया उम्मेदवार जुयाच्वंम्ह माओवादीया अध्यक्ष प्रचण्डं थःगु नां लित कायेधुंकूगु दु। वय्कलं नां लित कायेधुंकाः चुनावया मैदानय् आः नेपाली कांग्रेसया उम्मेदवार रामचन्द्र पौडेल याकःचा जक ल्यं दनि। तर मैदानय् वय्कः याकःचा जक दुगु खःसां मतदान सम्बन्धी नियमं वय्कःयात विजयी घोषणा धाःसा याइ मखुनि। चुनाव त्याकेत वय्कलं स्पष्ट रुपं हे ५१ प्रतिशत मत कायेमाः। थ्व मत वय्कःयाके मदु। उकिं याकःचा प्रतिस्पर्धी खःसां वय्कः त्याइ मखुनि ।

थ्व चुनावय् आः एमालेया नापनापं माओवादी नं याकःचा च्वनीगु जूगु दु। माओवादीं हालया चुनाव प्रक्रियां न्हूम्ह प्रधानमन्त्री ल्यइगु सम्भावना मदु, उकिं आः सहमतिया लिधंसाय् न्हूम्ह प्रधानमन्त्री मालेगु धकाः थःपिनि नां लित काःगु खः। तर फुक्कं राजनीतिक पार्टीत थःगु नामय् मेपिं वःसा सहमति जुइ, मेपिनि नामय् थःपिं वनेमाःसा सहमति जुइ मखु धइगु मूर्खतापूर्ण अडानय् कायम जुयाच्वंगुलिं सहमतिया प्रधानमन्त्री लुइकेगु असम्भव दु।गबलय् तक पार्टीतय्सं थः बाहेक देशय् मेपिं नं प्रधानमन्त्री जुइत लायकपिं दु धइगु खँयात महसुस याइ मखुनि, अबलय् तक सहमतिया प्रधानमन्त्री ल्ययेगु न्हि म्हगस हे जक जुइ। थौंया मतदान मुलुकया ई व स्रोत खर्च यायेगु मेगु छगू निरर्थक न्हि जुइगु निश्चित दु ।

More Stories Like this