थःगु म्हसीका मालेगु झ्वलय् बाकादे आजु

शिला साय्मि

यंयाःजःछि वंगलय् ब्वयातःम्ह आजुद्यः ला सकस्यां खना हे च्वंगु दु। व हे आजुद्यः ज्वःलाःम्ह मेम्ह आजुद्यः नं वंटु त्वालय् वनेगु गलिचाय् ब्वयातःगु सिउपिं धाःसा म्हो हे जक दु। द्यःया ख्वाःपाः उथें च्वं। वंचुगु वर्ण। छ्यं छगः जक। पाःगु थुलि हे जक, आजुद्यः थें सतकया दथुइ मलाःगुलि सकस्यां मखं। अले तिसा आदि नं उलि मदु। उलि झःझः मधाः। ख्वाःपाः लिउने त्यप स्वाः। म्ह मदु। छ्यनय् च्वय् ब्रम्हाया ख्वाःपाः दु। ब्रम्हाया जःखः निम्ह निम्ह नाग दु। कुकुइ नागया माला क्वखायातःगु दु। थुम्ह आजुद्यःयात बाकादे आजु धायेगु याः ।

झी पुर्खां धयातःगु कथं आजुद्यःपिं पुलांपि जुजुपिं, गुम्ह तसकं तान्त्रिक विद्या सःपिं सिनावनाःलि द्यः जुइ धाइ। गथे कि पचली आजु आकाश भैरव खः। उथें तुं बाकादे आजु नं न्हापा बागू देय्या अधिपति खः धइगु किंबन्दती दु। जमलं लिउने मेगु राज्य। जमलं दुने वसपोलया राज्य। वंगलय् वय्कःया लायूकु धइगु जनविश्वास दु ।

यःसिं थनेवं हे पूजा यानाः वसपोलयात आसनं क्वकाइ। लंपुं छाये क्वचाल कि बहनी त्वपुयाः वटुया गल्लिइ च्वंगु खतय् ब्वये यंकी। पूजा क्वचाल कि जक ख्वाःपाः उली। थःनेयाः अर्थात यँयाःपुन्हि कुन्हु कुमारी वंगलय् थ्यन कि हाथु हायेकेमाः। नापं समय्बजि नं इना बीमाः। थ्वँ व समय्बजि प्रसाद नल धाःसा ल्वइ दइ मखु धइगु जनविश्वास दु। गुथि खलःतसें म्हतिं छन्हु स्वांपाः फयेमाः। थुम्ह भैरवयाथाय् बलि बीगु चलन मदु ।

थ्यंमथ्यं १२०० दँ न्ह्यः स्वनातःगु अनुमान यानातःम्ह बाकादे आजुया संरक्षण थौंकन्हय् वंटु मानन्धर गुथिं यानाच्वंगु खः। पीदँ ति न्ह्यः थुगु गुथिं जिम्मा काःगु खः। न्हापांनिसें वंटुया हे मानन्धरतसें चले याना वयाच्वंगु गुथिया आयस्त मदयावंसेंलि धमाधम गुथि खलःतसें त्वःता हल। गुथि बन्द जुइगु व नित्य पूजा तक नं यायेत समस्या जुसेंलि गुथि खलःत सकलेंनाप सहलह ब्याकाः वंटु मानन्धर गुथिं जिम्मा काःगु खः ।

थनंनिसें गुथिया स्थिति बांलाना वःगु गुथि खलःया दुजः लिलारम मानन्धरं कनादी। पुलांगु भ्वाथःगु द्यःछेँ न्हूधाः यासेंलि थौंकन्हय् पसःया बालं हे गुथि बांलाक चले जुयाच्वंगु दु। न्हापा द्यःया तिसाया नापं किकिंपा व परवाह जक दुगु थासय् झिंन्यादँ न्ह्यः मुकुट व नागमाला नं दयेकूगु खः। वयां लिपा मेमेगु नं तिसात विस्तारं तनायंकूगु दु ।

न्हापा द्यवं थःपिंत संरक्षण यानाच्वंथाय् थौंकन्हय् द्यःयात थःपिंसं संरक्षण यायेमाःगु अवस्था दुगु खँ नुगः मछिंकुसे वय्कलं कनादी। पुलांपिं गुथि खलःतसें द्यःया विषयय् चिउताः मकाःगु कारणं उलिमछि द्यःया सम्पत्ति वं नः थ्वं नः मदयावन। उलि जक मखु द्यःया इतिहास तक नं थःपिंसं मसीका च्वनेमाल ।

थःमचाबलय्या खँ लुमंकुसें वय्कलं कनादी, 'भूगोलपार्क व नेपाल राष्ट्र बैंकया भवन द्यःया निजी पुखू खः। उगु पुखूया पलेस्वां द्यःयात छायेमाः। येँयाः न्ह्यः स्वां काः वने न्ह्यः पुखुली पूजा वइगु खः। थुगु पुखूया लिउने च्वंगु पुरानो भंसार वस्तीयात थौंतक नं पुखूद्यां धायेगु याःनि।'
द्यः शान्तिया स्वरुप खः। द्यःपिं फुक्कं छम्ह हे खः। अथे नं द्यःया नां थीथी तयाः मनूतसें थीथी कथं हनाच्वंगु दु। वसपोलया भक्ति यानाः आपालं मनूतय् भिं जूगु दु।
भक्तजनपिनि दर्शन यायेया निंतिं सुथबःछि द्यःछेँय् खापा चायेका तइ। वंगलं खुखा ति छेँ च्वय् विशाल बजारया झ्वलय् छगू गल्लिया लुखां दुने जवपाखे वसपोलया छेँ दु। यँयाः क्वचाल कि हाकनं त्वपुयाः हे द्यःछेँय् बिज्याकी ।

More Stories Like this