पाहांयात सुइच्यागः ख्येँय् सिरपा

ज्याझ्वलय् वःपिं पाहांपिं मध्ये छम्ह पाहांयात गोलाप्रथां सिरपा बिइगु क्वःछिइ । सिरपाया घोषणा जुइ - सुइच्यागः ख्येँय् । सुइच्यागः मछिं ख्येँय् गुकथं छें यंकेगु, छुकिइ तयाः यंकेगु ? शायद पाहानं उकथं हे बिचा: याःगु जुइ, तर सिरपा जुयाच्वनी सुइ तयाः च्यागः ख्येँय् ! अले थुगु सिरपा त्याकादीम्ह खः विशेष तुलाधर । अथेहे मेगु सिरपा (डोर प्राइज) मरिप्वः (छपाः अँय्थ्या मरि व निगः लालमोहन) व अमलि छप्व: । थज्याःगु हे न्ह्याइपुगु क्रमलिसे थुगुसीया ख्यालिगुलु मुना क्वचाःगु दु ।

ख्यालिगुलु गुथिं दँय् दसं सापारुया लसताय् ख्यालिन्हिलि ज्याझ्वः यायेगु झ्वलय् संचवाः येँया पर्यटन बोर्ड हलय् न्ह्याइपुक क्वचाल । ज्याझ्वलय् इमेज च्यानलया 'सम्हय् बजि' पुचःया ख्यालः, रवि डंगोल, नरोत्तम मानन्धर आदि कलाकारं म्हितुगु व शुशील राजोपाध्याया परिकल्पनाय् संवाद मदुगु ख्यालः व विजय मानन्धर 'चिन्तनं' च्वयादीगु व अर्णपुर्णेश्वरी सहितया कलाकारया पुचलं ख्यालः न्ह्यब्वःगु खः ।

अथे हे भिंतुना जोशी, सुरवी श्रेष्ठ व किकिंपा पुचःया प्याखं व लसता जोशी, रत्नशोभा महर्जन, रिता महर्जन आदि कलाकारपिनिगु म्ये, रूपेन्द्र श्रेष्ठया प्यारोडी म्ये, रामकृष्णा खड्गीया ख्यालिखँ व जादूं ज्याझ्वःयात थप न्ह्याइपुका बिल ।

मूपाहाँ नेपाल पर्यटन विकास वोर्डया प्रमुख भाजु प्रचण्ड मानजुं त्वा:देवाय् मत च्याका उलेज्या यानादीगु ज्याझ्वलय् ख्यालिगुलु गुथिया प्रवक्ता सुरेश किरणं लसकुस यानादीगु खःसा गुथिया नायः गणेशराम लाछिं सुभाय् देछानादीगु खः । ज्याझ्वः भाजु हृदयप्रसाद मिश्रं न्ह्याकादीगु खः।

ज्याझ्वःया किपाया लागि थन क्लिक यानादिसँ

More Stories Like this