लोक साहित्य परिषदया स्वक्वःगु तःमुँज्या क्वचाल

लोक साहित्य परिषदया स्वक्वःगु तःमुँज्या थौं नेपालभाषा एकेदमिया हलय् जुल । लोक साहित्य परिषदया संस्थापक व संरक्षक नापं मूपाहां सत्यमोहन जोशीं त्वाःदेवाय् सुकुन्दां मत च्याकाः ज्याझ्वःया उलेज्या यानादीगु खः । परिषदया छ्यान्जे लक्ष्मीशोभा शाक्यं बार्षिक प्रतिवेदन व दांभरि वासुदेव श्रेष्ठं आर्थिक प्रतिवेदन न्ह्यब्वयादीगु खःसा ज्याझ्वः परिषदया नायः प्रा. प्रेमशान्ति तुलाधरया सभाध्यक्षताय् जूगु खः ।

थ्वहे झ्वलय् लिपा प्रा। प्रेमशान्ति तुलाधरया अध्यक्षताय् न्हूगु ज्यासना पुचः नीस्वन । न्हूगु ज्यासना पुचलय् आनन्द कृष्ण कर्माचार्य व वीर सिं महर्जन न्वकू, राजीत बहादुर श्रेष्ठ छ्यान्जे, ईश्वरी मैंया श्रेष्ठ ल्यू छ्यान्जे, बासुदेव श्रेष्ठ दांभरि व तिमिला रंजित ल्यू दांभरी च्वनादीगु दु । अथेहे दुजलय् काजीमान डंगोल, लक्ष्मीशोभा शाक्य, निर्मला श्रेष्ठ व दीलिप जोशी च्वनादीगु दु ।

अथेहे निगूगु ज्याझ्वः कथं 'नेवाः लोक चित्रकला' गोष्ठि नं जुल । उगु गोष्ठी लोक चित्रकारं 'नेपाःया परम्परागत चित्रकला:पौभा' व शारदा चित्रकारं 'पुंज्या:नेवाः लोक कला म्हसीका'या ज्यापौ न्ह्यब्वयादीगु खःसा ज्यापौयात कयाः छसिकथं मदन चित्रकार व अमीरमान चित्रकारं टिप्पणी यानादीगु खः । ज्याझ्वलय् सभाध्यक्ष प्रा. प्रेमशान्ति तुलाधरं नेवाः लोक चित्रकला पौभाः थेंजाःगु गहन विषयस जानकारी बियादीगुलिं सुभाय् देछासें थुकियात नं लोक साहित्य विषयया पाठ्यक्रमय् दुथ्याकेमाःगु खँ धयादिल ।

More Stories Like this