कसाःया बाखं मुना 'जीवनया चाकलय्' पिदन

च्वमि शरद कसाःया न्हूगु बाखं मुना सफू 'जीवनया चाकलय्'या विमोचन थन छगू ज्याझ्वःया दथुइ जूगु दु ।

अर्थपिथना प्रकाशन प्रा.लि.या पिथना बाखं मुना सफू 'जीवनया चाकलय्'या विमोचन नांजाम्ह कलाकार नापं च्वमि रामशेखर नकःमिं यानादीगु खः । सफूया उलेज्या यानादिसें ज्याझ्वःया मू पाहाँ नकःमिं शरद कसाः छम्ह जीवनया सुझबुझ दुम्ह व बाखं प्रति निपुन्ता दुम्ह यथार्थपरक च्वमि जूगु धयादिल ।

बाखं च्वमिं राजा शाक्यं नेपालभाषाया ख्यलय् न्ह्याःगु नं यायेत तयार जुम्ह कसां थुगुसी बाखं मुना पिथना भाषाया ग्वाहालि याःगु धयादिल । अर्थपिथनाया नायः रमेशकाजी स्थापितं थीथी च्वमिकय् थःथःगु छगू जक च्वयेगु पहः दइगु तर कसाःयाके धाःसा छगू जक मखसें थीथी आयाम दुगु धयादिल ।

ज्याझ्वलय् बाखं मूनाया च्वमि कसां उगु सफूति दुगु निनीपू बाखं मध्ये 'छेँ धइगु हे Everything खः' ब्वना न्यंकादीगु खः ।

More Stories Like this