कांग्रेसपाखें वार्ता अस्वीकार
* आइतवाःया प्रधानमन्त्री चुनाव नं निरर्थक जुइगु
* लिच्वः वयेकाः जक कांग्रेस सनी
* झलनाथ व प्रचण्ड छथाय् वल
येँ (सन्ध्या टाइम्स)/आइतवाः जुइगु प्रधानमन्त्री ल्ययेगु चुनावय् आः एमाले थें माओवादी नं तटस्थ च्वनीगु जूगु दु। माओवादी उम्मेदवार प्रचण्डं प्रतिस्पर्धापाखें थःगु नां लित कायेधुंकाः आः थःपिं नं मतदानय् तटस्थ च्वनेगु धकाः निर्णय याःगु खः ।
थःपिंसं नां लित कायेधुंकाः आः सहमति दयेकेगु लागिं नेपाली कांग्रेसया उम्मेदवारं नं नां लित का धकाः इनाप यायेत थौं एमाले व माओवादीं याःगु इनापयात कांग्रेसं 'फुर्सद मदुनि' धकाः अस्वीकार याःगु दु ।
सूत्रं बिउगु जानकारी कथं नकतिनि क्वचाःगु कांग्रेसया नेतृत्व ल्ययेगु चुनावया सम्पूर्ण लिच्वः पिहां मवःतले प्रधानमन्त्री चुनाव बारे वार्ता यायेगु मखु धकाः कांग्रेसं लिसः बियाहःगु खः। कांग्रेस महाधिवेशनया पदाधिकारीतय् लिच्वः पिहां वयेधुंकूसां दुजःतय् लिच्वः धाःसा पिहां मवःनि। थुकिया मतगणना थौ नं जुयाच्वंगु दनि। फुक्कं दुजःतय् लिच्वः आइतवाः न्ह्यः पिहां मवइगु खँ धाःगु दु ।
कांग्रेस सूत्रं धाः कथं फुक्कं लिच्वः पिहां वयेधुंकाः नं न्हूगु कार्यसमितिया बैठक मच्वंकं प्रधानमन्त्री ल्ययेगु बारे कांग्रेसं वार्ता याये फइगु अवस्था मदु। नेपाली कांग्रेसया चुनावय् सुशील कोइराला व वय्कःया हे प्यानलया अप्वः मनूत त्याना वःगु कारणं प्रधानमन्त्री ल्ययेगु चुनावय् माओवादीयात सहयोग जुइ कथंया ज्याखँ जुइगु सम्भावना मदुगु खँ सूत्रं धाःगु दु ।
चुनावपाखें प्रधानमन्त्री ल्ययाः बहुमतीय प्रणालीइ वनेगु मखु धकाः एमाले व माओवादी सहमत जुइधुंकूगु दु। उकिं आः माओवादी थें कांग्रेसं नं उम्मेदवारी लित कयाः सहमतीय प्रधानमन्त्री ल्ययेगु धइगु प्रस्ताव एमाले व माओवादीं तःगु खः। तर अज्याःम्ह सहमतिया प्रधानमन्त्री सु जुइगु धइगु व्यक्तिया खँय् धाःसा अझ नं सहमति जुइफुगु मदुनि ।
सूत्रया कथं माओवादीया सुं नं मनूयात समर्थन यायेगु ज्या कांग्रेसं याइ मखु। महाधिवेशनं सुशील कोइराला त्यायेधुंकाः थ्व ज्या आः झन हे सम्भव मदया वंगु दु। उकिया नापनापं थौंकन्हय् माओवादीलिसे जानाः गठबन्धन हे दयेकेगु कथंया तयारी यानाच्वंगु कारणं झलनाथ खनालयात नं कांग्रेसं विश्वास यायेगु त्वःता हःगु खँ सूत्रं धाःगु दु। उकिसनं झलनाथ खनालया नांयात कयाः स्वयम् एमाले दुने नं सहमति कायम जुइगु सम्भावना म्हो जक दु धाःगु दु ।
उखे कांग्रेसया नं सुं हे मनूया नामय् माओवादीं समर्थन याइगु सम्भावना मदु। लिसें माओवादीं झलनाथ खनालयात समर्थन हे याःसां नं पूर्ण सहमति मदइगु खःसा एमालें हे खनालयात समर्थन मयायेफु। थज्याःगु अवस्थाय् प्रधानमन्त्रीया ल्यज्या अझ जटिल जुइगु खँ धाःगु दु ।
