सभापति कोइराला अस्पताल भर्ना
कार्यकर्तायात नापलाके मबिउ / थौं नं मत गणना
येँ (सन्ध्या टाइम्स)/नेपाली कांग्रेसया झिंनिक्वःगु महाधिवेशनं सभापति पदय् त्यात धकाः घोषणा जूगु १२ घण्टा हे मजाःनिवं नवनिर्वाचित सभापति सुशील कोइरालायात थौं सुथय् अस्पताल भर्ना याये माल।
वय्कःयात थौं सुथय् प्यताः इलंनिसें हे लगातार मुसु वःगुलिं साढे ९ बजेपाखे शिक्षण अस्पताल महाराजगंजय् भर्ना याःगु खः ।
नव निर्वाचित कोइरालायात खँ ल्हाये मजिउ धकाः चिकित्सकतय्सं सल्लाह बिउगुलिं कांग्रेस पार्टीया नेता कार्यकर्तायात तकं नापलाके बियाच्वंगु मदु। कोइरालायात निमोनिया जूगु खँ धाःगु दु। येँया बुद्ध नगरय् थः भिंचाया छेँय् च्वनाच्वंगु इलय् म्हं मफयाः अस्पताल यंकेमाःगु खः ।
महाधिवेशनया अन्तिम न्हि म्हिगः जूगु मतदानया लिच्वः कथं मुक्कं ३३५ मतया अन्तरं सुशिल कोइराला त्याःगु खः। ३०८८ मत मध्ये मतदानय् ३०६२ मत जक कुतुंवंगु खः। कोइरालां १६५२ मत काःगु खःसा निकटम प्रतिद्वन्द्वी शेर बहादुर देउवां १३१७ मत अले मेम्ह उम्मेदवार भीमबहादुर तामाङं ७८ मत काःगु खः ।
उखे पार्टीया केन्द्रीय पदाधिकारी मध्ये महामन्त्री व कोषाध्यक्ष पदया नितिं थौं सनिलंनिसें पार्टीया केन्द्रीय ज्याकू सानेपाय् मतगणना याइगु जूगु दु । महामन्त्री पदय् कोइराला प्यानलं प्रकाशमान सिंह, कोषाध्यक्षय् पद्मनारायण चौधरी दंगु खःसा शेरबहादुर देउवाया प्यानलं महामन्त्रीइ विमलेन्द्र निधि व कोषाध्यक्षय् चित्रलेखा यादव दंगु खः ।
सभापति पदय्सिबें महामन्त्री व कोषाध्यक्ष पदय् तसकं धेधेबल्लाः जुइगु अले तसकं म्हो जक मतं त्याःबू जुइगु खँ धाःगु दु। अथे हे ६१ म्ह केन्द्रीय दुजःया निंतिं कन्हय् जक मतगणना जुइगु खँ धाःगु दु ।
