धर्मया नामय् जुयाच्वंगु राजनीतिक ज्याखँ

येँ हनुमानध्वाखाय् जुइत्यंगु छगू ज्याझ्वलय् ब्वति कायेत पिहां वनेत्यंम्ह पुलांम्ह जुजु ज्ञानेन्द्रयात म्हिगः प्रशासनं वय्कःया छेँय् हे पना बिल। देशय् सांस्कृतिक राजतन्त्रया चर्चा जुइसातकि हे पुलांम्ह जुजु व वय्कःया छेँजःपिं अनेक कथंया धार्मिक ज्याय् सक्रिय जुया वःगु खनेदु। थ्वहे झ्वलय् म्हिगः हनुमानध्वाखाय् जुइत्यंगु अज्याःगु हे छगू धार्मिक ज्या�वलय् वय्कलं ब्वति काइगु ग्वसाः दुगु खः। तर म्हिगः जुइत्यंगु उगु ज्याझ्वः अतिकं आपत्तिजनक खःसा उकी ब्वति काः वनेगु झन हे आपत्तिजनक खँ खः। छाय्धाःसां ग्वसाः खलकं नियोजित रुपं हे ज्याझ्वः यायेथाय् वय्कःयात 'श्री ५ महाराजाधिराज' धइगु संवोधन यानाः पोष्टर तिकातःगु खः। थ्व पोष्टरं स्पष्ट याः, उगु ज्याझ्वः धार्मिक खःसां उकिया लिउने राजनीतिक अभिष्ट सुलाच्वंगु दु। कुमारी सालीकुन्हु दँय्दसं मरुइ जुजु वइगु परम्परा दु। थौं अन राष्ट्रपति झाइ तिनि। थ्व वास्तवय् थौंया ज्याझ्वःयात लिच्वः लाकेत हे म्हिगः पुलांम्ह जुजुयात मरुइ सःतेगु प्रपंच जूगु खँ नं अःपुक हे थुइकेफु। उकिं धार्मिक ज्याखँ हे खःसां नं पुलांम्ह जुजुयात 'जुजु' धकाः संवोधन यानाः न्ह्याकेत्यंगु उगु ग्वसाः आपत्तिजनक खः। ज्याझ्वः हे मयाकेबलय् धार्मिक आस्थाय् लिच्वः लाः वनेफु। उकिं पुलांम्ह जुजुयात जक अन वनेगुपाखें पना बिउगु पाय्छि हे खः। छुं नं धार्मिक सभासमारोहय् सहभागी जुइगु वय्कःया अधिकार खः, तर धर्मया नामय् जुइत्यंगु छुं नं असंवैधानिक ज्यायात पनेगु राज्यया दायित्व नं खः। राजनीति हे यायेगु खःसा ज्ञानेन्द्रजुया लागिं मैदान खुल्ला दु। थुकथं छद्म ज्याखँत याना जुइबलय् वय्कःया छबी भिनी मखु, अप्वः स्यनी ।

More Stories Like this