बुँख्याःचा

सूर्यमान राजभण्डारी

म्हिगः मजुल, थौ नं मजुल।
कन्हय् जुइ ला मजुइ ला?
चुपाउँ स्वयां पाउँगु
प्रमया चुनाव छगू
दछिया दुने क्वचाइ ला क्वमचाइ ला?

थःगु जिम्मेवारी पूवंके मफुपिंत पतुचाया लः त्वनाः सिना हुँ धकाः धाइगु नेवाः धापू दु। थ्व धापू छ्यलाः थौंया देय्या वर्तमान राजनैतिक अवस्थायात कयाः देय्या नेतातय्त थथेभनं धायेगु ई ला मवःनि थें च्वं अले थथेभनं धायेबलय् पाप जकं लाइ ला? तर थःगु जिम्मेवारी भ्याः भतिचा हे पूमवंकूसे न्ह्याबलें न्ह्यलंब्वानाः भत्ता जक नइपिंत धर्म नं अवश्य लाइ मखु जुइ। झीसं ब्वना वयागु पुलांगु बाखं "द इम्पेरर क्लोथ" या जुजुं थें थनया नेतातय्सं नं थःत जनता प्रति वफादार धाःसां जनताया मिखाय् धाःसा नेतात नांगापचि हे जुइधुंकल। संविधानसभाय् संविधान च्वये धकाः वंपिं सभासदतय्सं भोटया ल्याःचाः मतसे नोटया ल्याःचाः जक तयाच्वन। जनतां बिउगु भोटया ग्यसु (तौल) गुलि दु धकाः मसिउपिं सभासदतय्सं नोटया ग्यसु बांलाक हे सिउगु जुयाच्वन। मखुसा छगू करोड नोटया ग्यसु झिंन्हय्गूया किलो दु धकाः सभासद भाजुं (?) गथे सिल? संविधान च्वयेगु ला गन गन न्हूम्ह प्रधानमन्त्री छम्ह हे ल्यये मफुपिं सभासदतय्सं संविधान च्वयेगु धकाः छगू बागू अरब स्वयां अप्वः ध्यबा (थीथी सुबिधा नापं कयाः) माकुक चाकुक नयेधुंकल। अले न्हूम्ह प्रधानमन्त्री ल्ययेगु झ्वलय् सभासदतय्सं बोनस कथं छगू छगू करोड नं भपीफु धकाः चर्चा जुल। बोनस भपिउसां भमपिउसां सभासदतय्सं अति सुबिधा भोजन याःगुलिं उकुस मुकुस जुयाः छम्ह निम्ह सभासद हस्पिटलय् त्यांग्रां पुल, छम्ह निम्ह सभासद संविधानसभाय् हे न्ह्यलं ब्वात। गंसिपिं जनतां तुलुतुलु स्वया जक च्वन ।

संविधानसभाय् संविधान मच्वसे न्हूम्ह प्रधानमन्त्री ल्ययेया निंतिं सभासदत झ्वःझ्वः च्वंगु प्याखं नं गुलि स्वयेगु, सभासदत न्ह्याक्व झ्वः छुनाच्वंसां छगू हे झ्वलय् गबलें च्वंगु मखुनि। छझ्वः छखे, छझ्वः मेखे, छझ्वः तटस्थ। ख ला प्रधानमन्त्री ल्ययेगु झ्वलय् दकलय् न्हापां हे न्हूम्ह प्रधानमन्त्रीया निंतिं बहुमत समर्थन नं वयेधुंकूगु खः। तर म्हुतुइ थ्यनेधुंकूगु प्रधानमन्त्री पदया कवाब नं ल्ह्वया छ्वये माल। देय्या छगू जिम्मेवार राजनैतिक पार्टीया ४०१ या चालं थौ देय् प्रधानमन्त्री मदुगु देय् जुयाच्वने माल। "काम चलाउ" प्रधानमन्त्री धाःसां ज्या छुं हे मयासे "नाम चलाउ" प्रधानमन्त्री जुयाः देय् न्ह्याका च्वने माल। तःन्हुनिसें देय् बेहाल जुल, सत्ता धस्वाके धाःपिं नेतात कायल जुल, जनताया नुगलय् चसक्क वनाः घायल जुल। देय्या दक्वं लागा भद्रगोल जुयावल। सिंहदरवारय् बजेट मदुगुलिं कर्मचारीतय्गु म्हिचा नं खालि जुयावल। थुगुसीया मोहनि नखः न्हापाया नखः स्वयाः अःखः जुइगु जुल। बजारय् सेयरया भाः कुहां वःथें खसि/दुगुया भाः नं कुहां वइगु जुल ।

बजाः भाः अस्थिर जुइफु, नेतातय्गु बिचाः हिलेफु, थज्याःगु माःगु खँयात स्थिर मयासें, देय्या राजनैतिक अवस्थायात स्थिर मयासें प्रधानमन्त्री ल्ययेगु ज्याय् जक बुँख्याःचा थें स्थिर छाय् जुइ माल? धाइगु नं दु - "थः वंसा तुति स्याः, कतः वंसा प्वाःस्याः।" थः प्रधानमन्त्री मजुइगु जूगुलिं कतःयात नं प्रधानमन्त्री छाय् यायेगु धयागु कपटी नीति मखुला थ्व? नकतिनि जूगु छगू घोषणा कथं प्रधानमन्त्री पदया छम्ह दावेदारं प्रधानमन्त्री पदया पगरी त्याग याइगु जुल। थ्व ल्याखं आः वइगु च्याक्वःगु चुनावय् प्रधानमन्त्रीया दावेदार सिंगल जुइगु जुल यद्यपि उगु चुनावय् कासा मम्हितुसे वाक ओभरं न्हूम्ह प्रधानमन्त्री अवश्य मजुइगु जुल। छाय्धाःसा याकः प्रधानमन्त्रीया दावेदार जूसां वयात माक्व भोट मवइगु जुल। भोटिङ्ग पावर दुपिं छपुचः सभासदत न्हापा हे बुँख्याःचा (तटस्थ) जुयाच्वने धुंकूगु जुल, अले नकतिनिया प्रधानमन्त्री त्यागी सभासदत नं आः वइगु प्रधानमन्त्रीया चुनावय् न्हूपिं बुँख्याःचा (तटस्थ) जुइगु धाल। नेपाःया "प्रधानमन्त्री चुनाव" टिभिइ वइगु ल्याःचाः मदुगु हिन्दी सिरियल थें जुइगु जुल। उकिं प्रधानमन्त्री चुनावया ल्याःचाः छु ल्याःचा, बुँख्याःचाया ल्याःचाः हे महान ल्याःचाः ।

www.thesuryaman.blogspot.com

More Stories Like this