यःसिं थना थनिंनिसें विधिवत रुपं येँया सुरु

विधिवत रुपय् यःसिं थनेवं थनिंनिसें येँया सुरु जूगु दु । नेपाल संवत् कथं यंलाथ्व द्वदशी अथे धयागु थौं सुथय् ९ बजे जुया २५ मिनेटया साइतय् यःसिं हनुमानध्वाखा कालभैरव न्ह्यःने थनेज्या जुल । यःसिं थंगु झ्वलय् नेपाली सेनाया टुकडीं मंगलधुन व पाचैबाजा थाःगु खःसा गुरुजुया पल्टनं तोप तःगु खः ।

नेवाः समुदायया साय्मि जातिं यःसिं थनेगु चलन कथं केन्द्रिय मानन्धर गुथिया न्ह्यलुवाय् साय्मि, नेपाली सेना व स्थानियं मिलेजुया यःसिं थंगु खः । उगु झ्वलय् मल्ल जुजुया राजखड्ग व शाह जुजुया प्रतिक कथं नारायणहिटि दरवारं तुयूम्ह सल तकं हःगु खः । वंगु भाद्र २५ गते शुक्रवाः सुथय् ८ बजे जुया ४५ मिनेटया साइतय् हनुमानध्वाखां गुरुजुया पल्टन व साय्मि गुथिया पदाधिकारीं ख्वपं स्वीनिकू ताःहाकःगु यःसिं काःवंगु खः । उगु हे दिं बहनी ९ बजेजुया २१ मिनेटया साइतय् यःसिं पालाः ख्वपया सल्लाघारी थिमी कोटेश्वर भोटाहिटी असन इन्द्रचोक मखं जुया हनुमानध्वाखा थ्यंकेहःगु खः ।

इन्द्रया ध्वजाया प्रतिक यःसिं थनेवं विधिवत रुपय् येँया सूरु जूगु खः । थनिंनिसें मजिपा लाखे, किलाघःया पुलुंकिसि, दि प्याखं, हलचोकया सवभकु प्याखं, ख्वपं मांङ्काली प्याखं पिकाया ल्हुइकी । अथेहे हनुमानध्वाखाय् स्वयेत भैरव, वंघलय् आकाश भैरव व थीथी थासय् थीथी भैरव लिकाइसा मरु नापं थीथी थासय् इन्द्र द्यः ब्वइ ।

असोज ६ गते म्वाःद्यः कुमारी भैरव व गणेशया रथजात्रा जुइ । जात्राया झ्वलय् राष्ट्रप्रमुखं विधिवत रुपय् कुमारीया दर्शन व पुजा यायेमाःगु परम्परा दु ।

More Stories Like this