१९ म्हेसिनं नां लितकाल
येँ (सन्ध्या टाइम्स)/येँय् न्ह्यानाच्वंगु नेपाली कांग्रेसया महाधिवेशनय् केन्द्रीय सदस्यया नितिं उम्मेदवारी दर्ता यानाः नं थौं जूबलय् नां लित काःपिं उम्मेदवारतय् ल्याः १९ म्ह थ्यंगु दु ।
खुल्लापाखे २५ म्ह दुजःया लागिं जुइगु चुनावय् उम्मेदवारी बिउपिं निम्ह, आदिवासी जनजाति, मधेशी व मुस्लिमपाखें छम्ह छम्ह अले मेगु अञ्चलपाखें उम्मेदवार जुयादीपिं नेतातय्सं अथे नां लितकाःगु खः। ६१ म्ह केन्द्रीय दुजःया नितिं ३५३ म्हेस्यां उम्मेदवारी दर्ता याःगु खः ।
थौं १२ बजे तक उम्मेदवारी लित कायेगु धकाः तयातःगु ईया दुने खुलापाखे उम्मेदवारी दर्ता याःपिं विश्वप्रकाश शर्मा व अशोक कुमार पोखरेलं उम्मेदवारी लित काःगु दु। अथे हे मुस्लिमपाखें फरमुल मन्सुर, आदिवासी जनजातिपाखें आन्दवा शेर्पा व कुसुम थापा, मधेशीपाखें राकेश सिंहं उम्मेदवारी लित काःगु खः ।
अथे हे नारायणी अञ्चलपाखें तेजनारायण पौडेल, लुम्बिनीपाखें गोकर्ण पौडेल, सेतीपाखें नरायणदत्त मिश्र, राप्तीपाखें धुर्वराज पुरी, हेमन्त मल्ल, गोपालजीजंग शाह, कोसीपाखें टंकप्रसाद राई, धवलागिरीपाखें सोभियत बहादुर अधिकारी, बागमतीपाखें ध्रुवप्रसाद अधिकारी, लोकेश ढकाल, मेचीपाखें दीपक प्रसाद बास्कोटां थौं थःथःगु उम्मेदवारी लित काःगु दु। महाधिवेशनया स्वन्हुया दिं थौं कांग्रेसया नीति नापं ज्याझ्वःया प्रतिवेदनयात कयाः सहलह ब्याकेगु ज्या जुयाच्वंगु दु ।
पार्टीया वरिष्ठ नेता शेरबहादुर देउवां न्ह्यब्वयादीगु उगु प्रतिवेदनयात कया सहलह ब्याकाच्वंगु खः ।
