नेतात सम्पन्न, देश जुल विपन्न

डी.आर. खड्गी

नेपाःया दुर्भाग्य थथे जुयाः जूगु खः। थन राजनीतिक पंडिततय्सं राजनीतिया नामं ब्यापार यानाः देश व जनतायात अति हे बर्वाद यानाच्वंगु दु। धर्म शास्त्रय् नं थथे धयाःतःगु दु। राजनीतिक व्यक्तित्व त्यागी, नैतिकवान, सुसंस्कृत, देशभक्त खःसा जक विकास यानाः जनतायात सुःख, शान्ति, आनन्द बीगुली ध्यान केन्द्रित जुयाच्वनी। तर नेपाःया राजनीति यानाच्वंपिं नेतात धाःसा शास्त्रय् धयातःगु महान् वाणीया अःखः लँय् न्ह्यानाच्वंगु दु। अथे धयागु त्यागी मखु, लालची, नैतिकता दुपिं मखु,अनैतिकता दुपिं, संस्कृति दुपिं मखु, संस्कृति मदुपिं, देशभक्त मखु, विदेशभक्त नेतातय्सं राज यानाच्वंगु दु। महाभारतया बाखनय् नं भिष्मपितामह व आचार्य द्रोणाचार्यं धयावंगु दु। ब्राम्हणं राजनीति यात कि देश ठीक जुइ मखु धकाः। यदि थ्व खँ सत्य मखुसा गुरु द्रोणाचार्यं नं जुजु जुइगु मौका वलं नं छाय् मजुल? द्रोणाचार्ययात द्रुपत जुजुं अपमान याःगु बदला कायेगु लागि थः शिष्यत पाण्डवयात आज्ञा बिल द्रुपत जुजुयात बन्दी यानाः जिगु न्ह्यःने उपस्थित या धकाः। पाण्डव बन्धुं युद्ध यानाः द्रुपत जुजुयात बुकाः गुरु द्रोणाचार्यया न्ह्यःने हल। द्रोणाचार्यया पासां द्रुपतयात धाल छिगु राज्य जिगु जुल। अथे खःसां जि जुजु जुइ मखु छाय्धाःसा ब्राम्हण जुजु जुल धाःसा देश ठीक जुइ मखु धकाः द्रोणाचार्यं द्रुपतयात हे राज्य लित बिल ।

झीगु देशय् राज्य धर्मया अःखः लालची, अनैतिक, संस्कृति मदुपिं खसब्रम्हू बिहारी मूलया ल्हाःतय् सत्ता लानाच्वंगु दु। झीगु धापूया अर्थ खस ब्रम्हू व बिहारी मूलया विरोध यायेगु मखु। खालि झीगु विरोध इमिगु नकारात्मक सोचयात कयाः जक खः। यदि सकारात्मक सोच ज्वनाः राजनीति यात धाःसा गुगुं नं जातिया विरोध यायेमाःगु आवश्यकता जुइ मखु। गथे अमेरिका, अष्टेरलिया, ल्याटिन अमेरिकाया छुं छुं देशय् विदेशी मूलया नेतातय्सं राजनीति यानाः उच्च पदय् च्वनाच्वंगु दु। देशया विकास यानाः जनतायात सुख व आनन्द बिया नं च्वंगु दु।
झीगु देशय् शासन यानाच्वंपिं लालची व नकारात्मक सोच दुपिं नेतात जुयाच्वंगुलिं विदेशी शक्तिया राजनीतिक चलखेल झनझन तच्वः जुया वनाच्वंगु दु। वंगु हप्ताय् अमेरिकाया राजदूत स्कट एच डिलिसीं प्रधानमन्त्री माधव नेपालनाप लानाः दबाव बियाः धाल "अनमिनयात पंगः थनेगु ज्या याये मते। अनमिनयात निर्धक्क रुपं ज्या याके माल।" अमेरिकाया राजदूतया धापूयात बेलायती व फ्रान्सया राजदूत तकं समर्थन यानाः नेपाःया सरकारयात थप दबाव बीगु यात। अनमिनया ज्या अझ नं यक्व बांकी दनि धकाः छगू हे सलं अमेरिका, बेलायत व फ्रान्सया राजदूततपाखें सरकारयात तच्वःगु दबाव बियाच्वंगु खः। छखे नेपाल सरकारयात सहसचिवस्तरया राजदूतपाखें दबाव बीगु यानाच्वनसा मेखे अनमिन प्रमुख जुयाच्वंम्ह करेन लेनग्रेनं राष्ट्रसंघय् पेश याःगु रिपोर्टय् नेपाल सरकारयात घोर विरोध यानाः नेपालयात बद्नाम यायेगु ज्या यात। अझ थुलि जक मखु माओबादी पार्टीयात समर्थन यानाः नेपाःया सेनायात नं बदनाम यानाः अन्तर्राष्ट्रिय ख्यलय् ज्या यानाच्वंगु शान्ति सेनायात तकं आँच वयेकेगु कुतः यात। झीगु देशया जक मखु राष्ट्रसंघपाखें तक अलग्ग यायेगु कुतः मय्जु करेन लेनग्रेनं याना वल। थनया नेतात नं गुलि लालची धयागु खँ स्पष्ट जुल। सहसचिवस्तरया कुटनीतिक व्यक्तित्वया न्ह्यःने तकं छसः थःगु खँ तये मफुं। थःगु देशय् जक निकम्मा ल्वापुखिचा धकाः क्यनाच्वंपिं मखु अन्तर्राष्ट्रिय ख्यलय् तक नं निकम्मा ल्वापु खिचा धकाः क्यनेगु यात ।

माओबादी पार्टी राष्ट्रसंघयात अलग्ग पौ छ्वयाः अनमिनया ज्या सकारात्मक जुयाच्वंगु दु धालसा नेपाल सरकारं माओबादीया धापूप्रति जिमिगु सहमत मदु धकाः पौ छ्वत। मेगु अशोभनीय ज्या विपक्षी माओबादी नेतातय्सं नं यानाच्वंगु दु। सरकार पक्षया नेतातयसं नं यानाच्वंगु खनेदु। व खः, छुं नं सभा, गोष्ठीइ माओबादी नेतातय्सं अनमिनया ज्याया तारिफ यानाः भाषण यानाच्वनीसा सरकार पक्षया नेतातय्सं अनमिनया ज्या ठीक मजू धकाः भाषण यानाच्वनी। सत्ताधारी पक्ष व विपक्षी माओबादी पार्टीया राजनीति गतिविधिं छुं क्यनाच्वंगु दु धाःसा तल्लोस्तरया राजनीतिक खेल बाहेक मेगु मसिउ धयागु क्यनाच्वंगु दु। यदि सक्षम विवेक दुपिं खःसा अनमिनया गलत गतिविधियात कुटनीतिक स्तर समाधान याकेगु स्वयेमाः। धात्थें देशभक्त नेता खः धकाः क्यनेगु खःसा आतंककारी गतिविधि न्ह्याकाच्वंपिं तराईया हतियारधारी पुचःयात सहयोग व समर्थन यानाच्वंपिंत विदेशीभक्तियात होशियार याये फयेकेमाः। तराई धुंकाः वहे विदेशीभक्तिं हिमाली भेगया मंगोलियन मूलबासीयात नं सहयोग व समर्थन यानाः नेपाल सरकार व चीन विरोधी भावना विकास यानाच्वंगु दु धाइ ।

अनमिन संस्था अमेरिकाया भ्रातृ संगठन थें जुयाच्वंगु दु। अनमिनं माओवादी पार्टीयात समर्थन यानाच्वंगु खनाः जनता अजू नं चायाच्वंगु दु। छाय्धाःसा छगू इलय् अमेरिकायात कम्यूनिष्ट शब्द वल कि एलर्जी जुइपिं खः। माओबादी पार्टीं नं मसिउगु मखु अमेरिका कम्यूनिष्ट विरोधी धयागु खँ। थ्व नं स्वाभाविक खः न्ह्यागु पार्टीं नं थःगु स्वार्थय् धक्का मलाःतले सुम्क च्वनाच्वनी। झीगु देशय् नं थथे हे जुयाच्वंगु खः। अनमिन माओबादीया पक्षय् वनाच्वंगुलिं सत्ता पक्षं उकिया विरोध जक यानाच्वंगु खः। तर, नेतातय्सं थ्व बिचाः यायेमाः कि पार्टी व व्यक्ति स्वार्थया लागि विदेशी शक्तियात चलखेल याकाः देश बर्वाद याके मजिउ धयागु खः ।

More Stories Like this