सहमतिया लुखा चायेकेगु न्हूगु कुतः

तःगूमछि चरणया कुतः लिपा नं प्रधानमन्त्री ल्यये मफयेवं अन्ततः राजनीतिक पार्टीत हानं सहमतीय सरकार दयेकेगु कुतःपाखे हे लिहां वंगु दु। थ्व कुतःयात तिबः जुइ कथं प्रधानमन्त्रीया चुनावय् ब्वाँय् वनाच्वंम्ह माओवादीया अध्यक्ष प्रचण्डं आः चुनावी प्रतिस्पर्धां थःगु नां लित काःगु दु। नां लित कायेगुया नापनापं सहमतीय सरकार दयेकेगु लागिं थःपिं मतदान प्रक्रियां नं अलग्ग च्वनेगु धकाः निर्णय याःगु दु। सहमतीय सरकार गठन यायेमाः धकाः एमाले न्हापा हे मतदान प्रक्रियां अलग्ग च्वनाच्वंगु खःसा आः माओवादी नं अलग्ग च्वना बिउगु कारणं नेपाली कांग्रेसया उम्मेदवार रामचन्द्र पौडेल याकःचा चुनावय् ब्वाँय् वनाया अर्थ मदु। एमाले व माओवादी चुनावी प्रक्रियां अलग्ग च्वना बीवं बाँकी फुक्क हे पार्टीत छथाय् च्वंसां नं बहुमत खाइ मखु। उकिं आः सहमतीय राजनीतिइ हे वनेगु लागिं नेपाली कांग्रेसयात दवाव लाः वंगु दु। शुक्रवाः नेपाली कांग्रेसया महाधिवेशन शुरु जूकुन्हु महाधिवेशनयात हे सन्देश बी कथं एमाले व माओवादी दथुइ उगु सहमति जूगु खः। कांग्रेस महाधिवेशनय् माओवादीं थ्व सन्देश न्यंकूगु नं खः। तर विडम्बना, कांग्रेसं धाःसा प्रचण्डं नां लित काःसां नं थःपिंसं नां लित काये मखु धकाः लिसः बिउगु दु। सम्भवतः आः एमालेया मत थःपाखे सालाः थःगु हे नेतृत्वय् सरकार गठन यायेगु कांग्रेसया बिचाः जुइफु। तर अज्याःगु अवस्था वयेगु लागिं या त एमालें माओवादीयात धोका बी मानि, या त एमाले विभाजन जुयाः छपुचः सभासदं कांग्रेसयात मत बी मानि। तर कांग्रेस थज्याःगु फोहोरी कासाय् वनेगु पलेसा सहमतिया लँपुइ वंसा वहे बांलाःगु समाधान जुइ ।

More Stories Like this