परोपकारी समाजसेवी कृष्ण

ईश्वर मानन्धर

मय्जु कृष्ण मानन्धरं येँ मनपाया महाराजगञ्जय् च्वंगु मनमोहन कार्डियो थोरासिक भास्कुलर एन्ड ट्रान्सप्लान्ट सेन्टरटिचिङ्ग हस्पिटलय् छगू समारोहया दथुइ थः मदुम्ह भाःत गोपालदास मानन्धरया लुमंतिइ वंगु भाद्र १४ गते स्वंगू ह्विलचियर लःल्हानादिल ।

उगु ज्याझ्वलय् थः स्वयम् उपस्थित जुइ मफुगुली माफी फ्वँसें थौंकन्हय् नेपाः वयाच्वनादीपिं तता व जिचादाजु जानकी व ईश्वर मानन्धर मार्फत् ह्विलचेयर लःल्हानाः थः मदुम्ह भाःतया आत्मायात चिरशान्ति दयेका व थःगु नुगलय् सदां बाय् च्वनेमा धइगु बेहोराया ईमेल वय्कलं लण्डनं छ्वयाहःगु खः ।

थ्वयां न्ह्यः क्षेत्रपाटीया अस्पतालयात नं वय्कलं स्वंगू ह्विलचियर बियादीग खः। लाबला न्ह्यः मय्जु कृष्ण मानन्धरथः हे येँय् वयाच्वंगु इलय् वीर अस्पताल व गंगालाल ह्दय रोग केन्द्रयात नं स्वंगू स्वंगू ह्विलचेयर बियादीगु खः ।

मय्जु कृष्ण मानन्धर ३५ दँ न्ह्यःनिसें थः नं ह्विलचेयरया हे ग्वाहालिं लन्डनया अति व्यस्त वातावरणय् जीवन निर्वाह यानाच्वनादीगु दु। थौंकन्हय् लण्डन बोरो अफ कैमडेनय् पब्लिक रिलेसन विभागय् ज्या यानाच्वंगु दु कृष्ण ।

सन् १९७८ य् गोपालदास मानन्धरलिसे इहिपाः जुइधुंकाः लण्डन वःगु छुं ई लिपा हे 'स्पाइन' सम्बन्धी ल्वचं कयाः स्वदँ तक अस्पतालया बेडय् च्वनाः वासः याकादीगु खः। थ्व सम्बन्धी आपालं विज्ञ डाक्टरतय्सं नं ल्वय् लंके मफुसेंलि वय्कः ह्विलचेयरया हे ग्वाहालिं जीवन निर्वाह यायेत बाध्य जुयादिल। अपांग जीवन हनेत बाध्य जुइधुंकाः लन्डनय् शारीरिक अपांगता दुपिंसं काये खनीगु सुविधा, शिक्षा व ट्रेनिङ्ग थेंज्याःगु ज्याय् कृष्णयात सहभागी यानाः अनुकुल सुविधासम्पन्न वातावरणय् ज्या यायेत हौसला, हिम्मत, ग्वाहालि थः भाःतपाखें हे चूलाकूगु ख। भाःतया माया, प्रेम, हौसला व ग्वाहालिया बलं भविष्यय् जीवन, जिम्मेवारी व जीविका चले यायेत वय्कः सक्षम जूगु खः। तर आकाझाकां हृदयघात जुयाः भाःत गोपालदासया निधन जुइवं धाःसा वय्कःया संसार हे छथुं खिउँया बिल ।

कृष्णं थः मदुम्ह भाःतया जन्मस्थल वीरगञ्जय् नं जेहनदार असहाय विद्यार्थीतय् ग्वाहालिया लागिं ट्रष्ट नीस्वनाः आर्थिक ग्वाहालिया परोपकारी ज्या न्ह्याका च्वनादीगु दुसा लन्डनय् नं हार्ड फाउण्डेशन, डेफ सोसाइटी थेंज्याःगु परोपकारी संस्थाय् मदुम्ह गोपालदास मानन्धरया नामं अनुदान बिया वयाच्वंगु दु। सेन्ट्रल लन्डनय् च्वंगु रसर स्क्वायर पार्कय् नं थःगु हे लागतय् स्व. गोपालदासया लुमन्तिइ बेन्च तयेके बिउगु दु।
लन्डनय् थः बसोबास यानाच्वंगु थाय्या लिक्क च्वंगु पार्क गन मदुम्ह गोपालदास मर्निङ्ग वाकय् वनेगु याइगु खः उगु पार्कय् मदुम्ह गोपालदासया लुमंतिइ 'टिवेटियन चेरी'या सिमा लन्डनया हे विशिष्ट व्यक्तित्वपाखें बृक्षारोपण याकूगु दु। उगु पार्कयात माःगु थाय् व सिमा न्यानाः माःगु फुक्कं खर्च थम्हं व्यहोरे यानादीगु खः ।

मेगु नं थज्याःगु हे परोपकारी ज्या यायेगु योजना कृष्णं यानाच्वंगु दु। विदेशय् च्वनाः छम्ह नेपाली मिसां मदुम्ह थः भाःतया आत्माया शान्ति व लुमंतिइ थुकथं समाजसेवा व परोपकारी ज्या यानाच्वंगु धाथें नं सकलें नेपाःमिया लागिं प्रेरणाया खँ खः ।

सुशिल स्वभाव, मिलनसार बानी व समाजसेवी प्रवृत्ति दुम्ह कृष्ण लन्डनय् च्वंपिं नेवाःतय् संस्था पासा पुचः गुथिया नं सक्रिय दुजः खः। साहित्यप्रति नं रुची दुगु कारणं पासा पुचः गुथिं याइगु सांस्कृतिक ज्याझ्वलय् वय्कलं नेपालभाषां च्वयातःगु चिनाखँ वाचन यानादी। छक्वः वय्कलं समाजय् व्याप्त अन्धविश्वास व कुरीतियात लक्षित यानाः नेपालभाषां चीहाकःगु प्रहसन च्वयाः थः नं उकी म्हिताः क्यंबलय् दर्शकत चकित जूगु खः। अपांगतय् दथुइ जुइगु स्वीमिङ कासाय् नं वय्कलं तःक्वःमछि पदक त्याकेधुंकल ।

थुगु ख्यलय् कृष्णयात दुत हयेगु श्रेय व प्रेरणा वय्कःया भाःतयात हे बीमाः। थौं थः भाःतया नाइसेच्वंगु बचन, माया, स्नेह व ग्वाहालिपाखें बञ्चित जुयाः संवेदनशील कष्टकरजीवन हनेत संघर्ष यानाच्वंगु दु कृष्णं ।

More Stories Like this