न्याये यःम्ह धातलें क्वाये यःम्ह लाइ

धर्मरत्न शाक्य

संविधानसभाया चुनाव धुंकाः देशय् शान्ति सुरक्षाया लँपु चाली नापं देय्या धुकू धिसिलाकाः सुशासनया प्रतीक नागरिक प्रशासन बल्लाइ धकाः जनमानसं कयाच्वंगु भलसा निराशाय् हिला वंगु खने दत। माओवादीया नेता प्रचण्डया सरकार लिउ एमालेया नेता माधवकुमार नेपालया सरकार नं सफल जुइ मफुत। उग्र बाम पार्टीया लिउ नाइसे क्यातुसेच्वंगु बाम पार्टी नं सन्तोषजनक सरकार रुपी यन्त्र छ्यले मसल। जनतां विश्वास यानाः अतिरिक्त मतं माओवादी पार्टीयात न्ह्यलुवा कथं न्ह्यःने हःगु मखु धाये फइ मखु। थथे प्रगतिशील पार्टीत छगूयां लिउ मेगु पार्टी असफलताया मू छु धकाः मालाः मालाः स्वयाबलय् तत्काल राजनीतिक पार्टीतय् दुजःत राष्ट्रिय स्वार्थ स्वयां अप्वः पार्टीया स्वार्थय् तक्यनाच्वंगु खने दत।
खतुं २०४७ सालया जनक्रान्ति लिपा हरेक पार्टीइ लुच्चा, खुच्चा, घुच्चा, घुस्याः, भ्रष्ट चरित्रयापिं मनूत आपालं चाकलि चुकलि व दांप्वः न्ह्यच्याका पार्टीया मू मू पदय् आसिन जुल। अथेहे निजामति कर्मचारीत राष्ट्रिय धुकूया तलब नयाः पार्टीया ताःचाप्वाँय् घानाः गन गन घूस नये दइ अन अन सरुवा बढुवा याः जुयाच्वन। भूतयात बौ तयेत म्वाःहि माः थें पार्टीया पदाधिकारीतय्त "द्यःयात लःसि थःत फंसि" धाः थें लबि रुपी बौ तयाः पार्टी न्ह्याकाच्वंगु सकसिनं सिउगु हे खँ खः ।

जनक्रान्ति लिपा पदया लोभय् नेतातय्सं क्यना हःगु राजनीतिक पहःचहः खनाः पार्टीप्रति जनतां घच्चाःगु थें महसुस याना हःगु दु। प्रहरीं मात्तुमालाः अपराधीत ज्वना हःसां राजनैतिक स्वार्थया कारणं वयागु मुद्दा लित कयाः अपराधीतय्त दण्डं मुक्त याःगुलिं आपराधिक मनोवृत्तिया मनूत प्रोत्साहित जुयाच्वंगु दु। दसुकथं म्हिगः एमालेया सभासद् डोलबहादुर कार्कीं छम्ह मनूयात नेपाल प्रहरीइ नियुक्ति बीकेत छगू लाख घूस नयागु खः धकाः स्वीकार याःगु न्यने दु। थुकिया नापं संघीयता विरोधी बामदेव गौतमया अनुयायी जूगुलिं वयात पार्टीया मनूतय्सं महाजालय् तक्यंका तःगु द्वपं बिउगु दु। खोल मतसे धायेगु खःसा एमालेया सरकारया इलय् बामदेव गौतमं गृहमन्त्री जुयादिल। उगु इलय् जिक्व हे संस्थागत रुपं भ्रष्टाचार याःगु बुखँ निजी लगायत सञ्चारमाध्यमं नं पिब्वःगु खः। छम्ह निम्ह बामदेवया लिक्क लाःपिं हनुमान पत्रकारत नं न्यालब्याल मयाःगु मखु ।

एमालेया कार्यकर्ता प्रचण्ड थैबया दत्या न्ह्यः बुटवलय् गोलीं कयेकाः हत्या याःम्ह माओबादीया जिल्ला नेता सुजित बिकयात प्रहरीं वाइसिएलया तत्कालीन रुपन्देही जिल्ला इन्चार्जयात येँया लुँहितिया होम प्यालेस होटलं ज्वन। एमालें सः थ्वयेकूबलय् हत्या याःगु मखु धकाः माओबादीं प्रतिकार मयाःगु मखु। तर, एमालेया सः तच्वः जुसेंलि माओबादीं सुजित बिकयात येँया मानव अधिकार आयोगयात लः ल्हानाबीगु बचंकथं लँय् हयाच्वंगु इलय् बिक बिसिउँ वंगु खः। उकिया छुं दिं लिपा थैब हत्या काण्ड ख्वाउँया वन। इलं सालीबलय् सुनां छु याये फइ? बिक थः हे येँय् वयाः ज्वंकः वल। वयात कारबाही छु जुइ, गुकथं जुइ, व ला भविष्यं हे धाइ ।

हाकनं छगू मेगु काण्ड न्ह्यःने वल - चिनियाँ राजदूतं नेपाःया ततःधंगु पत्रपत्रिकाया सम्पादक, प्रकाशकतय्त इलय् ब्यलय् थःथाय् सःताः अन्तर्क्रिया (सहलह) याइगु जुयाच्वन। अथेहे छगू सहलह जुयाच्वंगु थासय् भदौ १९ गते छम्ह पत्रकारयात छगू मित्रराष्ट्रया छम्ह वरिष्ठ कूटनीतिज्ञया फोन वल। "जिके छगू टेप दु अखबारय् पिकाये फु ला?" धकाः न्यन। उगु थासय् नेपाःया नांदंपिं पत्रकारत दु। मेमेगु थासं नं अन फोनया लहर न्ह्यात। माओबादी नेता कृष्णबहादुर महरां छम्ह चिनियाँ मनूलिसे फोनय् खँ ल्हाल्हां सभासद् न्यायेगु लागिं ५० करोड तका फ्वंगु सम्बन्धी टेप जुयाच्वन व ।

टेलिफोन याःम्हं उगु टेप याकनं सार्वजनिक यायेमाःगु धाल। छाय् धाःसा भदौ २० गते जुइगु न्हय्क्वःगु प्रधानमन्त्री चुनावय् मधेशवादी पार्टीतय्सं माओबादीयात मत बीत धौति-धौति जक पानाच्वंगु ई ।

अथे फोन वःगुयां घौछि लिपा हे "नेपाल�वान" टेलिभिजनय् उगु टेप प्रशारण जुइधुंकल। कन्हय् कुन्हु अन्नपूर्ण पोष्ट व नागरिक न्हिपतिं न्हापांगु पृष्ठय् उकिया बुखँ च्वया हल। तर कान्तिपुर, काठमाडौं पोष्टं आखः छगः हे मच्वः। छाय् मच्वःगु खः?

छखे एमाले तटस्थ च्वनाबिउगुलिं न्हय्क्वःगु प्रधानमन्त्रीया ल्यज्या असफल जुल। नेपाली कांग्रेसयात एमालें मत मबिउगुलिं प्रधानमन्त्री जुइत मगाः। माओबादीयात मत बिउ, पार्टी हे कुचा जुइगु खतरा। उखे प्रचण्ड थैब थेंज्याःम्ह माओबादीया शिकार जूम्ह थः कार्यकर्ताया परिवार नं मि हे जुइगु जुल ।

थ्वहे झ्वलय् एशिया महादेशया हे महान् कुटनीतिज्ञ चाणक्यया छगू श्लोक न्ह्यब्वये -
दुर्बलस्य बलं राजा बालानां रुदितं बलम्।।
बलं मूर्खस्य मौनत्वं चौराणा मनूतं बलम्।।
अर्थ: बमलाःम्हसिया बल सरकार, मचातय् बल ख्वयेगु। मूर्खया बल न्वमवासे सुम्क च्वनेगु, खुँया बल असत्य खँ ल्हायेगु ।

वास्तवय् थ्वयात हे धाइगु खः, न्याये यःम्ह धात्तलें क्वाये यःम्ह लाये यः धाःगु ।

More Stories Like this