माओवादीं नां लितकाइगु
एमाले व माओवादीं चुनाव त्वःतीगु
माओवादी-एमालेया सहमति
येँ (सन्ध्या टाइम्स)/एकीकृत माओवादी व एमालेया शिर्ष नेतातय् दथुइ थौं सुथय् गोप्य वार्ता जुया प्रधानमन्त्रीया चुनावय् माओवादीपाखें प्रधानमन्त्रीया नां लित कायेगु अले माओवादी व एमालें बहुमतीय प्रक्रिया अन्त्य मजूतले चुनावय् ब्वति मकायेगु धकाः सहमति जूगु दु। सहमति कथं आः वइगु १० गते जुइगु प्रधानमन्त्रीया चुनाव न्ह्यः हे प्रचण्डं उम्मेदवारी लित काइगु जूगु दु ।
प्रधानमन्त्री माधव कुमार नेपाल, एकीकृत माओवादीया अध्यक्ष प्रचण्ड, एमालेया अध्यक्ष झलनाथ खनाल नापं मेमेपिं नेतातय्गु दथुइ उगु कथं सहमति जूगु खः। स्वंगू बुँदाय् जूगु सहमति पतिइ माओवादीया नायः प्रचण्ड व एमालेया नायः झलनाथ खनालं ल्हाःचिं तयादीगु दु। उगु सहमित कथं आः माओवादी एमालें गबले तक बहुमतीय प्रणाली कथं चुनाव जुइ अबले तक चुनावय् ब्वति मकाइगु अले सहमतिय प्रणालीया नितिं निगू हे दलपाखें कुतः याइगु जूगु दु। येँया गैह्रीधारा लागाया छगू गैर सरकारी संस्थाया ज्याकुथिइ जुगु वार्ताय् अथे सहमति जूगु खः।
प्रमया चुनावय् बहुमतीय प्रणाली कथं न्ह्याना च्वनीगु अवस्थाय् माओवादीं प्रधानमन्त्रीया उम्मेदवारी नां वैधानिक कथं काये हे मदैगु तर राजनीतिक रुपं जक घोषणा याये फैगु नापं छुं जुया नां लितकयागु धकाः घोषणा याःसां चुनाव जुइगु इलय् धाःसा निम्ह हे उम्मेदवारया नामय् न्हापा न्हय्क्वःतक जूगु चुनाव थें हे जुइ धकाः संविधानविद्तय्सं धयादीगु दु ।
एमाले व माओवादी ब्यागलं च्वनीगु अवस्थाय् मेगु फुक्क हे मत कांग्रेसया उम्मेदवार रामचन्द्र पौडेलयात वन धाःसां वयागु पक्षय् बहुमत मदैगु जुया थुगु चुनावया प्रणालीं गुगु नं हालतय् न्हूम्ह प्रधानमन्त्री ल्यये मफैगु अवस्था ब्वलनीगु जूगु दु। माओवादी व एमाले नापं प्रधानमन्त्री नेपालया दथुइ जूगु सहमति कथं गबले तक न्हूगु प्रक्रियाय् वनी मखु अबले तक हे माधवया नेतृत्वय् कामचलाउ सरकार जुया च्वनीगु जूगु दु ।
