मतदातातय् नां व किपा आः कम्प्युटरय्

देय्या निर्वाचन प्रणालीयात अझ अप्वः व्यवस्थित व विश्वसनीय दयेकेगु ताः तयाः निर्वाचन आयोगं मनूया किपा समेत दुगु मतदाता म्हसीकापौ दयेकेगु ज्या शुरु याःगु दु। म्हीगंनिसें थ्व ज्या शुरु जूगु दुसा वइगु १३ गते तक त्वाःत्वालय् हे न्ह्यानाच्वनीगु ग्वसाः दु। निर्वाचनयात निष्पक्ष, धाँधलीरहित यायेगु मू उद्देश्य तयाः थ्व ज्या न्ह्याकूगु खः उकिं थुकियात सकलें मतदातां सफल यायेगु सकस्यां कर्तव्य जू वइ ।

मतदान नागरिकयात प्राप्त अनेक विशिष्ट अधिकार मध्ये छगू खः। लिसें थ्व लोकतन्त्रया कसि नं खः। अज्याःगु मतदान यायेगु अधिकारपाखें सुं नं बञ्चित मजुइमा धकाः थथे किपा सहित दुगु मतदाता म्हसीका पौ दयेकेमाःगु खः। विश्वया आपालं विकसित देशय् थज्याःगु म्हसीकापौ दयेकीगु चलन दु। अले गन गन देशय् थज्याःगु म्हसीकापौ दु अन अनया निर्वाचन अप्वः प्रतिशत निष्पक्ष जूगु तथ्यांक दु। नेपालय् नं निर्वाचन प्रणालीयात अत्यधिक विश्वसनीय रुपं कायेगु मयाः। थन न्ह्याबलें नं पराजित व्यक्ति वा दलं विजयीयात धाँधलीया द्वपं बियाः उन्मुक्त जुइगु अवसर कयाच्वनी। आः किपा समेत तयाः धलः दयेकीबलय् अज्याःगु सम्भावना तसकं कम जुइसा मतदातात नं सुं हे थःगु मतदान अधिकारपाखें बञ्चित जुइ माली मखु। अले थ्व धलः सदां ल्यनाच्वनीगु छगू धिसिलाःगु अभिलेख नं जुयाच्वनी। खतुं थ्व प्रणाली निर्वाचन आयोगं न्हापा हे हयेमाःगु खःसा हयेगु धकाः कुतः नं यानाच्वंगु खः। लिबाक जूसां आः जुल, थ्व बांलात। बरु थ्व ज्याय् सुं नं मतदाता त्वःमफीमा, उकी धाःसा आयोग सतर्क जुइ हे माः ।

More Stories Like this