मुक्कं ध्यान नेकां महाधिवेशनय्
महाधिवेशन लिपा राजनीतिइ न्हूगु मोड
येँ (सन्ध्या टाइम्स)/कन्हय् शुरु जुइत्यंगु नेपाली कांग्रेसया महाधिवेशनय् देय्या सम्पूर्ण राजनीति केन्द्रित जूगु दु। खास यानाः महाधिवेशनं सु नेता त्याना वइ धइगु खँय् फुक्क हे पार्टीया ध्यान वनाच्वंगु खनेदु। लिसें देशय् न्हूम्ह प्रधानमन्त्री ल्ययेगु ज्या तकं कांग्रेस सुयागु नेतृत्वय् वनी धइगु खँय् निर्भर जुयाच्वंगु विश्लेषण थन राजनीतिक वृत्तं यानाच्वंगु दु ।
विश्लेषकतय्सं धाः कथं थ्व चुनाव मूलतः सुशील कोइराला व शेरबहादुर देउवा दथुया प्रतिस्पर्धा खः। यदि कोइराला त्यात धाःसा उकिं देय्या न्हूगु सरकार, शान्ति प्रक्रिया आदि सवालय् तकं न्हूगु मोड वयेफु। कोइराला माओवादी प्रति कडा नीति ज्वनीम्ह जूगुलिं वय्कःया प्यानल धाःसा एमालें प्रधानमन्त्री चुनावय् कयाच्वंगु थःगु तटस्थताया नीतिइ पुनर्बिचार यायेमालीगु अवस्था वयेफु। थुकिं एमालेया झलनाथ खनालयात थाकुइका बीसा खड्ग ओलीयात अःपुका बी। कोइराला त्यात धाःसा माओवादीया लागिं नं थाकुगु ई शुरु जुइ ।
छुं जुयाः देउवा त्यात धाःसा उकिं धाःसा मध्यमार्गी लँपु पिहां वइगु खँ धाःगु दु। चुनावय् सुशीलया प्यानलय् कोइराला व गणेशमानया पुस्ता दुगुलिं थ्वहे प्यानलं त्याइगु यक्व सम्भावना दुगु खँ धाःगु दु ।
