कांग्रेसया झिंछक्वःगु महाधिवेशन

नेपाःया राजनीतिक इतिहासय् आपालं उथलपुथल यायेत सफल नेपाली कांग्रेसया १२ क्वःगु महाधिवेशन कन्हसंनिसें येँय् शुरु जुइत्यंगु दु। छगू इलय् विभाजन जुयाः हानं एकीकृत जूगु जक मखु कि पार्टीया एकछत्र सर्वमान्य नेता जुयाच्वंम्ह गिरिजाप्रसाद कोइराला मदयेधुंकाः जुइत्यंगु न्हापांगु महाधिवेशन जूगु कारणं नं थ्व महाधिवेशनया बिस्कं महत्व दु। लिसें कांग्रेसं थःगु स्थापना कालंनिसें कया वयाच्वंगु थीथी वैचारिक मुद्दात त्वःताः गणतन्त्र, संघीय प्रणाली थेंज्याःगु नीति नाला कायेधुंकाः जुइत्यंगु थेंज्याःगु महाधिवेशन जूगु कारणं नं थुकिया मेगु हे कथंया महत्व दु ।

थुगुसी कांग्रेस नेतृत्वया लागिं उम्मेदवारी बियाच्वंपिं नेतातय्सं थःपिनि मुद्दायात न्हापा थें पुस्ताया आधारय् मखुसें बिचाःया आधारय् उम्मेदवारी बियाच्वंगु दु। कांग्रेसयात आः पुस्ताया आधारय् मखुसें बिचाःया आधारय् न्ह्यःने न्ह्याकेगु अवसरया रुपय् नं थ्व महाधिवेशनयात कायेगु पाय्छि जुइ। छाय्धाःसां थ्व चुनावय् नेतृत्वया लागिं उम्मेदवारी बियाच्वंपिं स्वम्हं नेतात छगू हे पुस्तायापिं खः। तर वय्कःपिनि बिचाः धाःसा आधुनिक व परम्परागत धकाः निगू धारय् विभाजित दु। थुगुसी स्वंगूगु धार धकाः पिहां वःगु पुचलं कांग्रेसयात मुक्कं न्हूगु हे बिचाः ज्वनाः न्हूगु दिशापाखे यंकेगु खँ पित हःगु दु। मेगु निगू पुचलं कांग्रेसयात न्हूगु बिचाः सिबें नेतृत्व जक न्हूगु यानाः पिकायेगु कुतः याःगु खनेदु। थ्व ल्याखं कांग्रेसया थ्व महाधिवेशन अतिकं महत्वं जाः। नेपाःया प्रत्येक लोकतान्त्रिक आन्दोलनय् कांग्रेसया अहम् भूमिका दु। पार्टीया थ्व क्रान्तिकारी छबीयात न्हूगु नेतृत्वं कायम हे याना तयेमाः ।

More Stories Like this