जनकवि दुर्गालाल श्रेष्ठया न्हूगु म्ये मुना -
विजयरत्न असंबरे
जनकवि दुर्गालाल श्रेष्ठया च्वसां पिदंगु म्ये मुना 'इलं हाःगु म्ये' शनिवाः (११३० ञलाथ्व ११) नेवाः सभासद् व नेवाः नेतातय्गु ल्हातः विमोचन जुया पिदनीगु जूगु दु । धर्मसेवक सुचित्रमान शाक्यया पिथनाय् पिदनीगु थ्व म्येचाः दुने मुक्कं झिंस्वपु म्ये दुथ्यानाच्वंगु दु । उकी मध्ये छपु म्ये धाःसा नेवाः राष्ट्रिय म्ये जुइ । अले थ्व म्ये नेपाः देय्या नांदंपिं नीन्याम्ह म्ये हालामिपिसं थःगु सः बियातःगु दु । थुकथं थ्व छपु बहुकलाकारया म्येया रुपय् पिदनेत्यंगु दु । नेवाः राष्ट्रिय म्येयात सः बिउपिं प्रेमध्वज प्रधान, योगेश वैद्य, रामेश श्रेष्ठ, रायन श्रेष्ठ, अमरराज शर्मा, रामकृष्ण दुवाल, पवित्र कसाः, सानुबाबु महर्जन, सतिश महर्जन, दिलिप माली, सुमित्रा महर्जन, काजिराम, सुलिन्द्र शाक्य, तीर्थ माली, सुरेन्द्र श्रेष्ठ, गुजे मालाकार, रिता महर्जन, रत्नशोभा महर्जन, रानीशोभा महर्जन, दिपा महर्जन, सिर्जना श्रेष्ठ, धर्म मुनिकार, मथुरा महर्जन, वीरप्रसाद भन्सारी व रामकृष्ण खड्गी खः । तसकं हे नांदंपिं व लोकंह्वाःपिं गायक-गायिकाया मंकाः सः थ्वयाच्वंगु थ्व राष्ट्रिय म्ये नेवाः संगीत ख्यःया निंतिं छपु च्वछाय् बहःगु म्ये जुइगु आश यानातःगु दु ।
'इलं हाःगु म्ये' म्येचाः दुने दुथ्यानाच्वंगु मेगु झिंनिपु म्ये दुने नं थन च्वय् न्ह्यथनापिं गुलिखे म्ये हालामिपिनिगु सः दुथ्यानाच्वंगु दु । वय्कःपिं बाहेक थुके सत्यनारायण मानन्धर, निसा देसार, प्रसाद श्रेष्ठ, लक्ष्मण पालिखे, गौतमदास मानन्धर, विश्व नेपाली, वीरमाया व संगीता शाक्य थेंज्याःपिं आपालं म्ये हालामिपिसं थःगु सलय् म्ये हालातःगु दु । जनकवि दुर्गालाल श्रेष्ठया च्वसां पिदंगु म्ये हरेक इलय् ईया सःकथं थ्वयेगु याः । थुकिया दसु यक्व हे दु । थन मच्वये । बरु उलि हे आश याये कि 'इलं हाःगु म्ये' नं थुगुसी ईया सः जुयाः सकलें नेवाःतय्गु नुगलय् थ्वयेमा । छगू बिस्कं हे कुतः कथं पिदनेत्यंगु थ्व म्येचालय् छम्ह निम्ह जक मखु तःम्ह संगीतकारतसें अलग अलग म्येयात लसय् हनेगु कुतः याःगु दु । थथे थथे ज्वःमदुगु संगीत सिर्जना याःपिं नांदंपिं संगीतकारत मनराजा नकःमि, जुगल डंगोल, गुजे मालाकार, सुरेन्द्र श्रेष्ठ, हरिशरण साय्मि, तीर्थ माली, पवित्र कसाः, रामकृष्ण दुवाल खः । वय्कःपिं नापनापं थुके नेवाः संगीत ख्यःया गबलें विना मवनीगु मत भाःपियातःम्ह संगीतकार स्व. द्वारिकालाल जोशीया लसय् नं छपु म्ये न्यने दइगु जूगु दु ।
गीत-संगीत ख्यलय् न्हू म्ये पिदनां च्वनी । म्येचाः नं पिदनाच्वनी । जनकवि दुर्गालाल श्रेष्ठं नं यक्व हे म्ये च्वये धुंकल । म्येचाः नं यक्व हे पिदने धुंकल । तर आः पिदने त्यंगु 'इलं हाःगु म्ये' दुने बिस्कं हे सवाः दु । वास्तवय् थ्व मुक्कं नेवाः म्ये खः । नेवाःतय्गु म्ये खः । नेवाःतय्गु निंतिं म्ये खः । उकिं सकल नेवाः संगीत ह्यःमितय्गु जक मखसें सकल नेवाःतय्गु निंतिं थ्व छचाः ज्वःमदुगु म्येचाः जुइ धइगु खँय् छुं हे शंका मदु ।
Related Stories
झमकयात मदन पुरस्कार, दुर्गालालयात जगदम्बा जनकवि दुर्गालालया दुर्गालालयात सूर्योदय स्रष्टा सम्मान कवि दुर्गालाल छिन्नलता विशेष सम्मानं सम्मानितMore Stories Like this
बाघ भैरवया भजन म्येँया म्यूजिक भिडियो सार्वजनिक दाफा भजन म्येँ नं आः म्यूजिक भिडियोय् श्रीच्छा प्रधानं त्याकल 'मिस नेपाल वर्ल्ड २०२३' या उपाधि नेपालभाषाया न्हूगु म्युूजिक भिडियो “याकः मिसाया छेँ खः झीगु किपू देयया प्यंगः थां” सार्वजनिक मिस नेवाः जिगु लुमन्ति व अनुभव
