नेवाः देय् दबूलिं झिंखुक्वःगु बुदिं हन

नेवाःतय् राष्ट्रिय संगठन नेवाः देय् दबूलिं थःगु झिंखुदँया बुदिं तःजिकः हंगु दु ।

देय् दबुलिं झिंखुदँ क्यंगु लसताय् मंगलवाः येँया परोपकार उच्च माविलय् छगू ज्याझ्वः यानाः बुदिं हंगु खः । देय् दबूया नायः नरेश ताम्रकारया सभापतित्वय् जूगु ज्याझ्वलय् सभामुख सुभासचन्द्र नेम्वाङ लगायत थीथी पाँहापिंसं सुकुन्दा च्याकाः ज्याझ्वःया उलेज्या यानादीगु खः ।

देय् दबूया न्वकू दीकप शाक्यं लसकुस यानादीगु ज्याझ्वलय् सभामुख नेम्वाङं देशय् हिउपा वःसां उकीयात संस्थागत यायेमफुगु धयादिसें थुकीयात संस्थागत यायेत नेवाः देय् दबूयात क्रियाशिल जुयाः न्ह्यायेत इनाप यानादिल । वय्कलं आन्दोलया उपलब्धीत संस्थागत यायेफुसा जक देय् दबूया लक्ष्य नं प्राप्ति जुइगु धयादिल ।

ज्याझ्वलय् माओवादी सभासद् दिलिप महर्जन, कांग्रेस सभासद तीर्थराम डंगोल, एमाले सभासद मंगलसिद्धि मानन्धर व नेपाः राष्ट्रिय पार्टीया सभासद् बुद्ध साय्मिं न्हूगु संविधानय् नेवाःतय्गु अधिकार सुनिश्चित यायेत छप्पँ जुइमाःगु धयादिल । देय् दबूया नायः नरेश ताम्राकारं देय् दबूलिं नेवाः पहिचान सहितया राज्य व नेवाःतय् अधिकार प्राप्तिया निंतिं नेवाःतय्त छप्पँ यानाः न्ह्याः वनीगु धयादिल ।

अथेहे नेवाः देय् दबूया संरक्षकपिं लक्ष्मण राजवंशी व मल्ल के. सुन्दर नापं नेवाः स्वायत्त राज्य मंकाः संघर्ष समितिया नायः दिलबहादुर श्रेष्ठं नं ज्याझ्वलय् थःगु नुगः खँ प्वंकादीगु खः । ज्याझ्वलय् सभामुख नेम्वाङं देय् दबूया लुमन्तिपौ उलेज्या यानादीगु खःसा देय् दबूया झिंखुक्वःगु बुदिंया लसताय् प्रधानमन्त्री माधवकुमार नेपालं छ्वयाह:गु भिंतुना पौ नं ब्वनाः न्यंकूगु खः ।

अथेहे उगु ज्याझ्वलय् नेपालभाषा कयाः एसएलएसी ब्यूपिं उत्कृष्त स्वम्ह, पुचः ब्वाज्याय् न्हाप लाःपिं, थीथी जातीय संस्थाया नायः लगायतपिंत हंगु खः । ज्याझ्वलय् देय् दबूया येँ जिल्ला समितिया नायः न्हुच्छेकाजी महर्जनं सुभाय् देछानादीगु खः ।

More Stories Like this