प्रहरी व सशस्त्र पुचः ल्वापु

भिडन्तय् सीम्ह जनतान्त्रिकया कार्यकर्ता

येँ (सन्ध्या टाइम्स)/थौं सुथय् सर्लाही जिल्लाया कर्मैया गाविस वडा नं. ३ या खुसि सिथय् सशस्त्र पुचः व प्रहरी दथुइ भिडन्त जुयाः छम्ह सीगु दु। सुथय् अथे हे ११ बजे पाखे अन प्रहरी व सशस्त्र पुचः दथुइ निखेरं गोलीं कयेकाः ल्वापु जूगु खः ।

बागमति खुसि सिथय् जूगु उगु ल्वापुइ लानाः विक्रम नांया छम्ह मनू सीगु दु। विक्रम नं धाइम्ह सुरेन्द्र नांयाम्ह उम्ह मनू तराईलय् भूमिगत रुपं सशस्त्र संघर्ष यानाच्वंगु जनतान्त्रिक मोर्चाया कार्यकर्ता खः धाःगु दु। उम्ह मनूयात प्रहरीं ताः ई न्ह्यवंनिसें मालाच्वंगु खः। थौं सुथय् व बागमती खुसि सिथय् च्वनाच्वंगु दु धइगु सुचं वःगु आधारय् प्रहरीं अन छापा मारे याःगु खः। तर प्रहरी थ्यनेवं अन सुलाच्वंपिं न्याम्ह खुम्ह सशस्त्र मनूतय्सं छक्वलं प्रहरीयात आक्रमण याना खःसा लिसलय् प्रहरीं न फायरिङ याःबलय् वयागु मृत्यु जूगु खँ स्थानीय प्रहरीं धाःगु दु। उकी प्रहरीपाखे धाःसा छुं क्षति मजूगु खँ प्रहरी उपरीक्षक पूर्णचन्द्र जोशीं कनादीगु दु ।

छुं ई न्ह्यः अनया ब्रम्हपुरी गाविसया सचिव इन्द्र श्रेष्ठया हत्याया जिम्मा थ्व हे विक्रमं काःगु खः। अथे हे बरहथवाया व्यापारी शम्भु दासया हत्याय् नं थ्वयागु स्वापू दुगु खँ प्रहरीं धाःगु दु ।

तराई लागाय् भूमिगत रुपं सशस्त्र संघर्ष याना वयाच्वंगु पुचःत दर्जनौं दुसां उकी मध्ये नं इलय् ब्यलय् चर्चाय् वयाच्वनिगु जनतान्त्रिक मोर्चा खः। जनतान्त्रिक मोर्चां तराई लागाय् चन्दा आतंकंनिसें मनूतय्त ख्याच्वः बीगु लगायतया थीथी आतंककारी ज्याखँत याना वयाच्वंगु दु।

चःबिइ सशस्त्र प्रहरीया लाश लुल
कन्चनपुरया सदरमुकाम महेन्द्रनगरय् च्वंगु पुष्पाञ्जली होटलय् सशस्त्र प्रहरीया छम्ह जवान सिनाच्वंगु लूगु दु। सशस्त्र प्रहरी बलया सीमा सुरक्षा ज्याकू महोत्तरीइ ज्या याइम्ह भीमदत्त नगरपालिका वडा १ बाराकुण्डया २७ दँ दुम्ह रामनाथ वंगु चान्हय् सिनाच्वंगु लूगु खः। सशस्त्र प्रहरी रामनाथ चःबिइ सिनाच्वंगु खः। नाथं आत्महत्या याःगु जुइफु धकाः नं प्रहरीं अनुमान याःगु दु ।