अनमिनया म्याद थपे यायेगु सहमति

अनमिनया म्याद मेगु छुं ई थपे यायेगु लागिं सरकार व माओवादी सहमत जूगु दु। तर गुलि थपे यायेगु धइगु खँय् धाःसा अझ नं मतभेद कायम हे दनि। सरकारं मेगु प्यला जक अनमिनया म्याद थपे यायेगु खँ धयाच्वंगु दुसा माओवादीं म्होतिं नं खुला, मखुसा दछि हे म्याद थपे यायेमाः धयाच्वंगु दु। म्यादया अवधि बारे मतभेद दुसां अनमिया कार्यादेश धाःसा आः गथे खः लिपा नं अथे हे यायेगु धइगु खँय् धाःसा सरकार नं सहमत जू वःगु दु। थ्व सकारात्मक खँ खः। अनमिनया कार्यादेश व अनुगनकारी भूमिकायात शंका याये मते धकाः अमेरिकां समेत बिचाः सार्वजनिक यायेवं नेपाः सरकार पुलांगु अडान त्वःताः अनमिनया पुलांगु हे कार्यादेश स्वीकार यायेत बाध्य जूवःगु खः। नेपाःया सरकार नेपाःया हे गुगुं राजनीतिक शक्तिं धयां माने जुइम्ह मखु। विदेशीतय्सं मधायेकं खःगु हे ज्या नं मयायेगु नेपाल सरकारया बानी हे जुइधुंकल।
उखे नेपाःपाखें सरकार व विद्रोही पुचः माओवादीया मंकाः पौ मवःगु कारणं नेपालय् अनमिनयात हानं छ्वया हयेगु वा महयेगु धइगु खँय् संयुक्त राष्ट्र संघ अन्यौलय् लानाच्वंगु दु। नेपाःपाखें सरकारया छगू व विद्रोहीया मेगु हे कथंया पौ वःगु कारणं राष्ट्र संघया महासचिव बान की मुनं नेपाःया सरकारया वैधानिकताय् हे न्ह्यसःचिं पिकासें भाषण याना हःगु खः। थुकिं यानाः राष्ट्र संघ व नेपाः सरकारया स्वापू झन हे ख्वाउँया वंगु खः। न्ह्यागुसां आः अनमिनया म्याद थपे यायेगु सहमति जूगु दु। आः थ्व अवधिया दुने सेना समायोजनया ज्या क्वचायेकेगु रोडम्याप तयार यानाः पलाः न्ह्याकेमाः ।

More Stories Like this