जुद्ध सम्शेरया लुमंति

नर्मदेश्वर प्रधान

खँयाखँय्

"थौंकन्हय्। छाय् थें। चांन्हि जुद्धसम्शेर लुमंकाच्वनी। नां कयाच्वने। बुरा जूलिसे जुद्धसम्शेर म्हइच्वनी। जँ स्याःसां जुद्धसम्शेर। तुति स्याःसां जुद्धसम्शेर जपे यानाच्वनी। जुद्धसम्शेरं अन हाछिकाः तयाच्वन जुइ" कलातं दः न्याकाः खँ न्यंकी ।

मखु। जुद्धसम्शेरया नां कयां छाय् तं? मालीबलय् नां कायेगु खः। लुमंकेगु खः। म्वायेकं। म्वायेकं वया नां कया जुइत व जिम्ह आजु मखु। थौंकन्हय् परिस्थितिं हे जुद्धसम्शेरया नां कायेकी। ल्याय्म्ह इलय् जुद्ध सम्शेरया नां कायेगु त्वह हे दइ मखु। थम्हं हे गाः। वइगुं थ्वइगुं नां कयाः मन तयाच्वनेम्वाः। आः स्व ले, उमेर वनी। फ्यतुनाः काचाक्क दने फइ मखु। सुनां नं थना बिउसा जिउ थें च्वनी। थुज्वःगु हे इलय् जुद्धसम्शेर लुमंसे वइ। कलाःयात धाये, "स्व, जुद्धसम्शेर गन महारानीतय् जक भरय् च्वनी। गुलिखे ज्याखँ वं सुसारे, नानी, केटीतपाखें तरे यानाच्वनी।" जुद्ध सम्शेर फ्यतुनाः काचाक्क दने फइ मखु। थनीपिं निम्ह प्यम्ह नानीपिं सेवाय् हाजिर जुइ। विस्तारं थनी। थः जुरुक्क दने मफइबलय् जुद्ध सम्शेर लुमंके। खास लुमंकेगु ला जुद्ध सम्शेर मखु। वया सुसारे नानीपिं खः। जिं छेँय् च्वंम्ह मय्जुयात हायेके। चिचीधंगु 'चानचुन खँय्' नं छंत छु दुःख बियाच्वने, दने फ्यतुइत नं छंत दुःख बियां छं छुं यानाः नयेमाली मखु। छ गनं चिले नं जी मखु। उकिं जिं जुद्ध सम्शेर लुमंकेगु। वयात थें जितः नं थन फ्यतुकीपिं सहयोगीत दुसा गुलि जिउ। फ्यतुनाः काचाक्क दनेत स्वये। प्यपा प्यपां चुइमाः। कर्पिनि न्ह्यःने ला मछासे हे च्वनी। ख ला जुद्ध सम्शेर लुमंकेगु पलख थःगु कष्ट ल्वःमंकेत मजाक यायेगु जक खः। वं काइगु सेवा झीसं गनं काये फइ। वया ला ग्वाःग्वाः महारानीपिं दु। सलंसः ल्यासेपिं सुसारे, नानी, केटीत लहिना तःगु दु। वया स्वाहाने त्वाथःपतिं, पलाःपतिकं सेविकातसें चाःहुइकाच्वने दु। जुद्ध सम्शेरया नां ख्यालं ख्यालं जक कायेगु खः। कलातं व थू मथू जिं मसिउ। थौंकन्हय् जुद्ध सम्शेरया नां काल कि व तं चाइ। जुद्ध सम्शेरया रासलीलाया खँ ल्हाये। व झं तं चाइ। "छितः नं जुद्ध सम्शेर थें जुइमास्ते वल ला?" कलातं इलय् ब्यलय् ध्याचू नकी। "जि जुद्ध सम्शेर जुइगु सम्भावना हे मदु। खँयाखँय् ला जुद्ध सम्शेर जुइ फइ। ज्यां जुइत ला कुस्त ध्यबा माः। धन माः। खांखां दरबार। महल माः। खाली खल्तीं जुद्ध सम्शेर जुइ फइ ला? कलात खँ थू। सामन्ती शोषक जुद्ध सम्शेर थें जुइत जिं गबलें स्वइ मखु। अय्नं इलय्ब्यलय् जुद्ध सम्शेरया नां कायेबलय् व तं चाइ ।

मोजा तनाच्वनी। छपा दइ। मेगु गन लाः गन लाः जुइ। पिहां वनेमाली। मोजां कायल याना बी। आखः ब्वनेत स्वये। चश्मा दइ मखु। माले। लुइ मखु। 'तयाथाय् छुं मदु' जि तंचाये। ख ला जिं चश्मा गन तया। जि थम्हं हे सियाच्वनी मखु। थुज्वःबलय् जिं कलाःयात हायेके, "स्व, जुद्ध सम्शेरं थुज्वःगु संकट गुबलें फयेम्वाः। मोजा न्ह्यःने तया बीपिं, न्ह्याका बीपिं दयाच्वनी वया। चश्मा मिखाय् तया बीपिं। लिकया बीपिं दयाच्वनी। महारानीपिनि छुं तन्ता, झंझट दइ मखु। सर्वसाधारणया अथे मखु। न्ह्यागु खँय् नं कलाःया भरय्। वयात हे धयाच्वनेमाः। वया लिमलात कि ग्वाहालि दइ मखु। अले तं वइ। तं फुक्क थः के हे जुइ। खः। झी थुज्वःपिनि समस्या जुद्धशमशेर लुमंकां हल जुइ फइ मखु। जिं सिउ। अय्नं छुं परे जुइ। तरे जुइ मखु। याकःचा जुइ। जुद्ध सम्शेरयात पासा थ्वये ।'

राणाकालय् राणातय् दरबारय् बांलाःपिं ल्यासेपिं मिस्त लहीगु धेंधेंबल्लाः जुइ। राणा दरबारय् मिस्त तये यंकीपिनि दथुइ प्रतिस्पर्धा जुइ। जुजुपिनि दरबारय् बांबांलाःपिं मय्जुपिं थ्यंके फत कि यंकूपिनि भाग्य चम्के जुइ। राणातसें दरबारय् ग्वाःग्वाः मिसात लहीगु यौन शोषणया निंतिं खः। दरबारय् राणातय् मस्तय्सं यौन शोषण अःपुक याइ। जुजु, जुजुया कायपिंसं थःत माया याःसा जिउ। थिउसा जिउ। लहिनातःपिं मिसातसें लोभ यानाच्वनी। तये यंकीपिंसं नं थम्हं यंकापिंत जुजु, जुजु�कायपिंसं लसपस याना बिउसा जिउ धकाः आशा यानाच्वनी। थुज्वःगु स्थितिइ यौन शोषण, यौन हिंसाया खँय् विरोध याइपिं दइ मखु। जुजु। जुजुया काय्पिंसं गुलि थिल, छ्यल उलि हे धन, वैभव दइ। जुद्ध सम्शेरया ला खँ ल्हानां हे मब्याः। धाइ। तसकं हे कामुक व। वया छम्ह टट्टु सल दु हं। चिचाधिकःम्ह। व हे सल गयाः बहनी दरबार दुने मय्जुपिनि क्वथा�क्वथाय् रसबस याःवनी हं।
राणा दरबारय् वैद्य लहिनातइ हं। व वैद्यया ज्या न्हियान्हिथं मय्जुपिंत पाचः इनेगु जुइ। पाचः नल कि प्वाथय् मचा थाइ मखु हं ।

राणातसें मिस्तय्त गुकथं छ्यः। वैद्य, पाचःया व्यवस्थां स्पष्ट जुइ। गुलिं मय्जुपिंसं वासः मनसे छले यायेत नं स्वइ। मचात दत कि नायेके फइ। मानमर्यादा अप्वइ। थथे वासः छले यानाः बुइकूम्ह जुद्ध सम्शेरया काय दु। जुद्ध सम्शेरं वयात काय नाली। व सम्भ्रान्त परिवारय् लाइ। प्वाथय् मचा थायेधुंकाः नं। मचा क्वकायेगु जुक्ति नं जुइ। पासापिं दथुइ ईर्ष्यां नं ज्या याइ। मचा प्वाथय् दइ। सुयागुं ल्हातं मनसे सुरक्षित जुइपिं चलाखपिं मय्जुपिं नं दु। भीम सम्शेरं थुज्वःगु परिस्थितिं सुरक्षित जूम्ह मय्जुयात लिपा बडामहारानी याइ। दरबारय् जुजुपिनि यःम्ह जुइत नानीपिनि दथुइ हानथाप जुइ। थःत जुजु, जुजुया कायपिंसं स्वयेमा। ययेकेमा। इपिं लालायित जुइ। जुजुपिंसं थीवं इपिं लुँ जुइ। दरबारया मिसातय् विश्वास जुइ। जुजुया खलः जूसा गाः। ल्याय्म्ह बुराया खँ मखु। ७० दँया भीम सम्शेरं २३ दँ दुम्ह मय्जुयात बडामहारानी याइ।
X X
जुद्ध सम्शेर कामुक। मिसाह्यः। सकस्यां सिउ। कलातं नं न्यनातःगु दु। जुद्ध सम्शेरया नां काये। वं जितः न्यंकी, "जुद्ध सम्शेर, जुद्ध सम्शेर, छितः नं जुद्ध सम्शेरयात थें टट्टु सल माल ला कि छु?"
"खँ न्यँ रे। टट्टु सल मखु धयां। फ्यतुइ। दने थाकुइ। जुरुक्क थना बीम्ह छम्ह माल धइगु का। छं गय् मथूगु?"

More Stories Like this