मोतिलानी सिरपाः लःल्हात

बिपिन कपाली 'चिकंमू'पाखें

नेपालभाषा विषय कयाः उत्कृष्ट ल्याः हयाः ताःलाःपिं भाजु व मय्जुयात बीगु 'मोतिलानी सिरपाः' थौं छगू ज्याझ्वः यासें लःल्हाःगु दु । दँय्दसं मोतिलानी ताम्राकारया बुन्हि कुन्हु बीगु खःसा वय्कः मदुधुंकाः थुगु सिरपाः न्हापांखुसिइ थौं लःल्हाःगु खः । थौं जुगु थुगु ज्याझ्वः १४ क्वःखुसिइ खःसा मदुम्ह ताम्राकारयात श्रद्धान्जली देछासें ज्याझ्वः न्ह्याकूगु खः ।

सिरपाः कमिटीया नायः हितकरवीर सिंह कसाःया सभापतित्वय् भाजु कसाःजुं हे त्वाःदेवाय् मत च्याकाः ज्याझ्वःया उलेज्या यानादीगु खः । मूपाहाँ नेपालभाषा परिषदया नायः फणिन्द्ररत्न वज्राचार्य व सभानायः कसाःजुं मोतिलानि ताम्राकारया किपाय् स्वांमा क्वखायेके ज्या जूगु खः ।

मोतिलानी सिरपाः कायेत ताःलाःपिं एस.एल.सी.पाखे २०६४ दँया उत्कृष्ट उजेन महर्जन, २०६५ दँया उत्कृष्ट रिना वज्राचार्य व २०६६ दँया उत्कृष्ट रोशन महर्जन, आइ.ए.पाखे २०६४ दँया उत्कृष्ट रश्मि नापित व २०६५ दँया उत्कृष्ट बिक्रम गैजु, बि.ए. पाखे २०६५ दँया उत्कृष्ट अनिल रत्न वज्राचार्य व २०६६ दँया उत्कृष्ट शान्ति महर्जन अथेहे एम.ए. पाखे २०६५ दँया उत्कृष्ट हरिकृष्ण डंगोल व २०६६ दँया उत्कृष्ट सानुराजा शाक्ययात हनादिसें दसिपौ लःल्हानादीगु खः ।

थ्वहे झ्वलय् मदुम्ह मोतिलानी ताम्राकारया काय् भाजु सुवर्णरत्न ताम्राकारजुं कोषयात छगू लख तका दां तनांदीगु दु ।

सिरपाःया संस्थापक नायः भाजु डा.सुन्दर कृष्ण जोशीं सिक्किमय् नेपालभाषाया थःगु हे औचित्य दु । अन नेपालभाषायात सरकारं मान्यता बी धुंकल । तर झीथाय् थौंतकनं नेपालभाषाया छुं औचित्य मदु धयादिसें नेपालभाषा ब्वमिपिं म्हो जुयावंगुलिं च्यूताः प्वंकादिल । नेपालभाषा मंकाः खलःया नायः पद्मरत्न तुलाधर, पूर्वमन्त्री प्रेम बहादुर शाक्य व जनकवि दुर्गालाल श्रेष्ठ पाहाँकथं झायादीगु ज्याझ्वलय् नेपालभाषा केन्द्रिय विभागया प्रमुख व सिरपाः कमिटीया न्वकू प्रा. प्रेमशान्ति तुलाधरजुं लसकुस यानादीगु खःसा ज्याझ्वः भाजु केशरत्न शाक्यजुं न्ह्याकादीगु खः ।

More Stories Like this