पासापिं नापलालां प्रम नेपाल

थौं धनुषाय् थःगु भूमिगत लागा स्वः वनीगु

येँ (सन्ध्या टाइम्स)/सरकार कामचलाउ खः, उकिं झ्यातुगु ज्या यायेमाःगु आवश्यकता मदु। न्हूम्ह प्रधानमन्त्री ल्ययेगु चुनाव जुइत अझ बाःछि हे मानि। संसद चले जूगु मखु। संविधान दयेकेगु ज्या ठप्प हे जुयाच्वंगु दु। उकिं प्रधानमन्त्री माधव नेपाल थौंकन्हय् अतिकं हे फुर्सदय् दी। थ्व फुर्सदया ईयात वय्कलं पुलांपिं पासापिं नापलायेगु ज्याय् खर्च यानादीगु दु। अथे हे पुलांपिं पासापिं नापलायेगु झ्वलय् प्रधानमन्त्री माधव नेपाल थौं धनुषा झाइगु ज्याझ्वः दु। वय्कः धनुषाय् पार्टी वा सरकारया ज्या ज्वनाः झायेत्यंगु मखु। थ्व वय्कःया नितान्त व्यक्तिगत व पुलांपिं पासापिं नापलानाः 'भलाकुसारी' यायेगु ल्याखं खः ।

वय्कः थौं धनुषाया मुरिवा धाःगु गामय् झाइगु ज्याझ्वः दु। थ्व वहे गां खः गन २०३० सालय् भाजु माधव नेपाल भूमिगत च्वनादीगु खः। अन अबलय् नेपाल नापं वर्तमान पार्टी अध्यक्ष झलनाथ खनाल लगायत मेपिं नेतात नं भूमिगत जूगु खः। माधव नेपाल थःगु जीवनय् छक्वः हे जेलय् लाःगु दु। वय्कःयात थ्वहे मुरिवा गामय् सुलाच्वंगु इलय् ज्वनायंकूगु खः। छगू इलय् माधव नेपालं थ्वहे गांयात थःगु पार्टीया हेड क्वार्टर समेत दयेकादीगु खः। भाजु नेपालं न्हापा धनुषा जिल्लाया हे सचिव जुयाः ज्या यानादीगु खःसा लिपा पार्टीया केन्द्रीय सचिव नं जुयादिल। अबलय् तत्कालिन मालेया हेड क्वार्टर थनं हे सञ्चालन जुइगु खः। उगु थासय् राजनीतिक चलखेल अप्वः जुयाच्वंगु सीकाः प्रहरीया मिखा लायेवं भाजु नेपालपिं स्थानीय किसानतय् वा तइगु भकारीइ समेत सुलाः ज्यान बचे यायेमाःगु खः। उगु इलय् स्थानीय जनतां थःपिंत तःक्वःमछि हे ज्यान बचे याःगु खँ भाजु नेपालं तःक्वःमछि हे कनेगु यानादी ।

भाजु नेपाल उगु इलय् स्थानीय मधेशी दलित धाःपिं व जनजातिया छेँय् आपालं हे च्वनादीगु खः। न्हापा थःपिंसं हे सुचुका तयाम्ह मनू थौं प्रधानमन्त्री जूगु खनाः स्थानीय जनता व वय्कःया अबय्यापिं स्थानीय 'पासापिं' तसकं लय्ताः। भाजु नेपालं थौं अबलय्यापिं वहे पासापिंत नापलानाः दुःखसुखया खँ ब्याकादीगु खँ धाःगु दु ।