भारतीय चलखेलय् चीनया चिउताः

नेपाः आः सी दयेक हे निगू तःधंगु जःलाखःला देय् भारत व चीनया स्वार्थया दथुइ बांमलाक फँसे जूगु दु। नेपालय् अत्यधिक रुपं तच्वयावंगु भारतीय चलखेल विरुद्ध चीन नं सक्रिय जुयाः कुहां वःगु कारणं नेपाः थ्व निगू तःधंगु देय्या कुटनीतिक स्वार्थय् फँसे जूवंगु खः। खास यानाः माओवादी प्रवक्ता कृष्णबहादुर महरां चीनया छम्ह नेतालिसे टेलिफोन वार्ता यानाः सभासद् न्यायेत चीनयाके ध्यबा फ्वंगु धकाः सार्वजनिक जूगु टेप संचार माध्यमयात उपलब्ध याःम्ह हे भारतीय राजदूतावास खः धइगु खँ पिदनेवं चीनं उकियात गम्भीर षडयन्त्रया रुपय् काःगु खनेदत। उकिं हे चीनया छगू कुटनीतिक पुचः नेपाः वयाः थःपिनि सरोकार क्यनाच्वंगु दुसा उगु पुचःया नेपाः भ्रमण बारे गोप्य जानकारी कायेगु लागिं भारतीय राजदूतं नेपाःया परराष्ट्र मन्त्रीलिसे बिस्कं नापलायेगु ज्या याःगु दु। छम्ह राजदूतं गुगुं छगू अमूक थासय् नापलायेगु धकाः सःतूथाय् नेपाःया परराष्ट्र मन्त्री ब्वाँय् जुइगु नं कुटनीतिक मर्यादायात मल्वःगु खँ खः। नेपाःया मन्त्री, प्रधानमन्त्री व मेपिं नेतातय् थज्याःगु हे मर्यादाहिन ज्यां यानाः चीन सतर्क जुइगु खः। नेपालय् ताः ई तक नं सरकार गठन याये मफयाच्वंगु, संविधान दयेकेगु ज्या ठप्प जुयाच्वंगु, थुपिं फुक्क हे ज्याया लिउने भारतया नं ल्हाः प्रस्ट हे खनेदु। भारतया थ्व सक्रियतां थःगु सुरक्षाय् खतरा वयेफु धकाः चीनं चिउताः क्यनीगु स्वाभाविक खः। चीनया थज्याःगु शंका व चिउताःयात निराकरण यायेगु ज्या नेपाःया खः। नेपालं भारत जक मखु चीनपाखें नं ग्वाहालि व सद्भाव काःसा हे जक देशं प्रगति याये फइगु खँयात नेतातय्सं ल्वःमंक मजिउ ।

More Stories Like this