मानन्धरतय् देपुजा गुथि-४

लक्ष्मीबहादुर मानन्धर

सिन्हः तिकेगुया उद्देश्य: - झीसं सयेकेगु, सीकेगु, बिचाः यायेगु, थुइकेगु, वाःचायेकेगु व म्हयात नियन्त्रण याइगु न्ह्यपुया लिक्क पिने कपालय् तिकूगु ह्याउँगु, म्हासुगु व हाकुगु (मोहनि) सिन्हःया अर्थ छसीकथं सूर्य, चन्द्र व नासःद्यःया प्रतीक खः। पृथ्वीइ दक्व प्राणीत मध्ये दकलय् सर्वश्रेष्ठ जूगुया मुख्य कारण मनूतय्के दुगु विशेष गुण 'विवेक' खः। मनूतय्सं थःगु मष्तिष्कया विवेकयात थःथाय् च्वंगु मतयात थः च्वनाच्वंगु थासय् जक जः दइ कथं चिब्याका (सीमित याना) मतसे सूर्य थें व चान्हय् चन्द्रमा थें थुइकाः (तेजिलो यानाः) तब्याका तयेमाः। अर्थात् विवेक थःगु व्यक्तिगत व थः जःया हक हीतया स्वार्थय् सीमित याना मतसे व्यक्तिगत स्वार्थयात, जः वा स्वार्थ थःगु त्वाः, गुथि, खलः व पुचः, थःगु समुदाययात, थःगु समुदायया स्वार्थ थःगु समाजया स्वार्थयात व राष्ट्रया स्वार्थयात व थःगु राष्ट्रया स्वार्थ विश्वया मानव समाजयात फयां फत्तले तिबः जुइकथं मफुसा पंगः मजुइकथं तब्याकाः छ्यलेमाः धाःगु खः। अले हाकुगु मोहनि सिन्हःया अर्थ थःगु म्हया ज्ञानेन्द्रीय व कर्मेन्द्रीययात बांलाःपिं वाद्यवादकतय्सं बाजं थानाः संगीतकारतय्सं म्येँ हालाः नर्टकतय्सं (प्याखं हुलीपिंसं) प्याखं हुलाः व कलाकारतय्सं अभिनय यानाः स्वकुमितय्त न्ह्यइपुकाः मुग्ध याः थें हिसि व सिद्धि दयेकाः छ्यलाः थःगु दुःख व सुखया ज्याखँय् व मेमेगु ज्याखँय् नं स्वापू दुपिं मनूतय्त विश्वास यानाः ययेका तयेमाः धाःगु खः।
स्वां छ्यनय् तयेगुया उद्देश्य: झी मनूतय् छ्यनय् दथुइ च्वंगु मष्तिष्क झीगु चेतना, स्मरण व विवेकया केन्द्र खः। थ्वहे थासय् इन्द्रीयया परमात्मा दु। वैद्यतय्सं थुकियात मस्तुलिङ्ग धाइ। लेवेन्दर व मेलिना नांया निथी नस्वाःगु स्वां दइ। लेवेन्दर वास्ना दुगु स्वां छ्यंया दथुइ तयेबलय् मष्तिष्कय् छथी रसायन श्राव जुयाः मष्तिष्कया भाव संवेदना केन्द्रय् अर्थात् हाइपोथेस्मस लिम्बिक सिष्टमया क्वय् लाः वनाः मानसिक तनाव व उदासिनता हटे जुयाः मानसिक क्षमता अप्वया वयाः नुगः चञ्चल मजुसे स्थीर जुइ। अले मेलिना नांया वास्ना दुगु स्वां छ्यनय् दथुइ तयेबलय् नुगलय् दुगु भय मदयेका बीगु व ल्वःमनीगु समस्या नं समाधान याइ ।

क्वखा क्वखायेगुया उद्देश्य: क्वखा ह्याउँगु व तुयूगु कापःया निथी दइ। ह्याउँगु क्वखा क्रान्ति व तुयूगु क्वखा शान्तिया प्रतीक खः। अर्थात् न्ह्यागु देय् व थाय्या समाजय् नं सज्जन व दुर्जन तथा भिंगु तत्व व मभिंगु तत्व दयाच्वनी। पाइगु छु धाःसा गनं गबलय् सजनत व भिंगु तत्वत अप्वः, दुर्जनत व मभिंगु तत्वत म्हो दयाच्वनी। गबलें गनं दुर्जनत व मभिंगु तत्वत यक्व व सज्जनत भिंगु तत्वत म्हो दयाच्वनी। सज्जनत व भिंगु तत्वत अप्वः दुथाय् व दइबलय् अप्वः शान्ति व म्हो जक अशान्ति जुइ। दुर्जनत व मभिंगु तत्वत अप्वः दुथाय् व दइबलय् अप्वः अशान्ति व म्हो जक शान्ति जुइ। छाय्धाःसा सज्जनतय् व भिंगु तत्वतय् स्वार्थ भिनीगुलिं उमिसं फयां फत्तले थःगु हीतया नापं मेपिनिगु नं हीत जुइगु मखुसा कर्पिंत अहित मजुइक थःथःगु हीत जुइगु ज्या यानाः थःगु स्वार्थ सिद्ध याइ। तर दुर्जनत व मभिंगु तत्वत कर्पिनि हीत जुइमा वा अहीत जुइमा न्ह्यागु यानाः जूसां थःगु स्वार्थ सिद्ध जुइगु ज्या याइ। उलि जक मखु सज्जनत गुलि कर्पिंत हीत जुइगु ज्या यायेफत उलि हे गौरवान्वित जूगु तायेकी। तर दुर्जनत गुलि कर्पिंत अहीत जुइगु ज्या यानाः थःगु स्वार्थ सिद्ध यायेफइ उलि हे थः गौरम्वान्वित जूगु तायेकी। अले सज्जनत यक्व दुथाय् दुर्जनतय्गु व दुर्जनत यक्व दुथाय् सज्जनतय्गु स्वार्थ सिद्ध जुइगु ज्या याये थाकुगुलिं सज्जन व दुर्जनतय् दथुइ गबलें गबलें बाहेक मेबलय् न्ह्याबलें धइथें संघर्ष जुयाच्वनी। संघर्षया मेगु नां खः क्रान्ति। सज्जनतय्सं दुर्जनतय् नाप संघर्ष व क्रान्ति यानाः गुलि त्याके फइ उलि हे शान्ति जुइ। गुलि शान्ति जुल उलि उन्नति याये फइ। गुलि उन्नति याये फइ उलि हे कल्याण जुइ। गुलि कल्याण जुल उलि हे सुखी जुइ। उकिं जीवनयात न्ह्याबलें क्रान्ति व शान्तिया लागिं तयार याना तयेमाः। गुलि जीवनयात क्रान्ति व शान्तिया प्रतीक खः धकाः थुइकाः इलय् सजग व सचेत याना तयेत महत्वपूर्ण पर्व पर्वय् ह्याउँगु व तुइगु क्वखा क्वखायेकीगु थिति झी दूरदर्शी व बुद्धिमान पुर्खातय्सं दयेकाः थकुगु खः ।

ज्वलान्हाय्कं क्यनीगु व स्वयेगुया उद्देश्य: झी मनूतय्सं न्हाय्कनय् थःगु ख्वाः व म्ह गथे च्वं धकाः स्वये थें थःगु आत्मायात नं स्वयेमाः धाःगु खः। थःगु आत्मायात स्वयेमाः धाःगुया अर्थ थःत थम्हं तुं म्हसीकाः आत्मज्ञानी जुइमाः धाःगु खः। आत्मज्ञानी जुइत क्वय् न्ह्यथनाकथं बिचाः यानाः थःत स्वयेमाः -
१) मनुष्य जीवन धइगु गज्याःगु खः?
२) मनुष्य जीवन हनेत व सुथां लाकेत मदयेक मगाःगु आधारभूत आवश्यकता छु छु खः?
३) अज्याःगु आधारभूत आवश्यकतात पूवंकेत थःके गज्याःगु भावना (उद्देश्य), चरित्र, योग्यता व क्षमता दयेमाः?
४) अज्याःगु भावना, चरित्र, योग्यता व क्षमतात मध्ये थःके छु छु दु, छु छु मदु?
५) थःके मदुगु व मगाःगु भावना, चरित्र, योग्यता व क्षमता गबलय् गुकथं दयेकेगु?
६) थौंकन्हेय्या युग व ई गज्याःगु खः?
७) थः च्वंच्वनागु थाय्बाय्, जः, त्वाः, गुथि, खलः, पुचः, समुदाय, समाज व राष्ट्रया व्यवस्था व अवस्था गज्याःगु खः?
८) च्वय् न्ह्थनाकथंया व्यवस्था व अवस्था थःत भिंगु व मभिंगु प्रभाव छु गज्याःगु लाःगु दु?
९) उकिया कारण व कारिणी सु?
१०) भिंगु प्रभावया सदुपयोग यायेत व मभिंगु प्रभाव मदयेकेत छिगु उत्तरदायित्व व भूमिका गज्याःगु जुइमाः?

(क्वचाल)

More Stories Like this