शान्ति सम्झौता पालना मयायेगुया अर्थ

सरकार व माओवादी दथुइ जूगु शान्ति सम्झौतायात गय् यानाः पालना यायेगु धइगु खँयात कयाः पिहां वःगु विवादं यानाः उगु सम्झौता हे संकटय् लाइगु स्थिति ब्वलंगु दु। नेपाली सेनां थःपिं अनमिनया अनुगमन क्वय् च्वने फइ मखु धयाहःगु कारणं अनमिनया भूमिका व शान्ति सम्झौताया भविष्य नितांयात कयाः न्ह्यसःचिं पिहां वःगु खः। नेपाली सेना अनमिन मातहत च्वंगु कारणं थुकिया नियमित ज्याखँय् हे समस्या पिहां वल धइगु तर्क न्ह्यःने तयाः सेनां थ्व बखेडा पिकया हःगु खः। आः वयाः
राष्ट्रिय सेना व माओवादी सेनायात बराबरीया अवस्थाय् तयातःगु सम्झौता माने याये मखु धायेगु पाय्छि मखु। छाय्धाःसां थ्व सम्झौता उगु ईया अवस्थायात कयाः जूगु खः। थौं सुयां बिचाः हिल धायेवं अबलय् जूगु सम्झौता पालना याये मखु धायेगु पाय्छि मखु। यदि अथे जुल धाःसा उकिं मुलुकयात हानं उगु शान्ति सम्झौता जुइ स्वयां न्ह्यःया अवस्थाय् यंकी। शान्ति सम्झौताया कारणं नेपाली सेनायात नं छुं ज्याखँयात अवश्य नं थाकुल जुइमाः। तर थौंया ई हे संक्रमणकालीन ई जूगु कारणं सेनां उगु असहज अवस्थायात सामना यायेमाः। उकिसनं देय् शान्तिपाखे न्ह्याः वनाच्वंगु कारणं सेनायात बल्लाका हे तयेमाः धइगु आवश्यकता नं मदु। यदि देय् युद्धपाखे वनाच्वंगु खःसा सेनायात बल्लाकेमाःगु आवश्यक जुइगु खः। शान्तिया इलय् नं सेनायात बल्लाकेगु ज्या जुल धाःसा उकिं अविश्वास ब्वलंकाः शान्ति भंग यायेगु ज्या याना बी। थ्व इलय् सुनां नं सेनायात बल्लाकेगु लागिं शान्ति सम्झौता पालना याये मखु धाल धाःसा वं युद्ध सःताच्वंगु दु धकाः थुइकेमाली ।

More Stories Like this