लण्डनय् तःजिगु नेवाः मुना

वंगु सेप्टेम्बर ४ संचवाः लण्डनय् तःजिगु नेवाः मुना ज्याझ्वः जूगु दु । यूके न्यंक न्यनाच्वंपिं नेवाःतय्त छथाय् मुंकेगु तातुना न्ह्याकूगु थ्व नेवाः मुना निक्वःगु खुसिइ जूगु खः ।

ज्याझ्वःया उलेज्या यासें बेलायतया लागि नेपाली राजदूत डा. सुरेशचन्द्र चालिसें नेपाःया संस्कृति विषयस चर्चा यानादिल । ज्याझ्वलय् वर्ल्ड नेवाः अर्गनाइजेशन तदर्थ समितिया नायः दया शाक्य विश्वन्यंकया नेवाःतय् प्रतिनिधि जुयाः मू पाहां कथं झायादीगु खः ।

एनआरएन यूकेया नायः सूर्य गुरुङ, पासा पुचःया राष्ट्रिय संयोजक शिवजी श्रेष्ठ, आयोजक समितिया संयोजक कपिल श्रेष्ठ, रुपक श्रेष्ठ व पासा पुचः गुथि यूकेया नायः कृष्ण चखुंपिन्सं न्ववानादीगु उगु ज्याझ्वलय् कासामि शेरबहादुर सुनार लगायत थीथी ख्यलय् विशिष्ट उपलव्धि हासिल यानादीपिं नेवाः प्रतिभापिं श्रृंखला ताम्राकार, रिष्ता श्रेष्ठ, गायत्री श्रेष्ठ व डा. पवित्रा शाक्ययात सम्मान नं याःगु खः ।

ज्याझ्वलय् विवेक श्रेष्ठ, मनिष श्रेष्ठ, ऋचा घिमिरे लगायतया कलाकार पुचलं सांस्कृतिक ज्याझ्वः न्ह्यब्वःगु खःसा उकिइ ख्वपया ख्वाःपाः प्याखं नं दुथ्याःगु खः ।

(ज्याझ्वःया किपाया लागि थन क्लिक यानादिसँ । )

More Stories Like this