सामाजिक रुपान्तरणय् ज्यापूतय् भूमिका च्वछायेबहः : नेम्वाङ

संविधानसभाया अध्यक्ष सुवासचन्द्र नेम्वाङ सामाजिक रुपान्तरणया निंतिं ज्यापूतय्सं म्हितुगु भुमिका च्वछायेबहः जूगु खँ धयादीगु दु । ज्यापू समाज यलया १७क्वःगु दँ मुँज्याया शुक्रवाः यलया छ्याबहाःलय् उलेज्या यानादिसें नेम्वाङं ज्यापू लगायत थीथी पुचःया सक्रियताय् आन्दोलन ताः लाःसां थुकीया मू आज्जू अझ चू मलानीगु धयादिल ।

वय्कलं देशय् संविधान निर्माण व शान्ति प्रकृया क्वचायेधुंकाः जक आन्दोलनया मू आज्जू ताः लाइगु धयादिल । नेम्वाङं संसदय् न्हय्क्वः तक चुनाव जुयाः नं प्रधानमन्त्री ल्ययेमफुगु धइगु व्यक्तिया खँ मजूगु धयादिसें थुकीं प्रणाली, प्रकृया व झी थः हे बुनावनाच्वंगु धयादिल ।

समाजया नायः रामकाजी अवालेया सभापत्विय् न्ह्याःगु ज्याझ्वलय् माओवादी सभासद् राजकाजी महर्जनं संघीय व्यवस्था दुने नेवाः राज्य प्राप्तिया निंतिं दक्वं छप्पँ जुयावनेमाःगु धयादिल । ज्याझ्वलय् नेवाः देय् दबू, नेपाल खड्की समाज, नेपाली कांग्रेस यल जिल्ला समिति लगायत थीथी संस्थां ज्यापू समाज यलयात भिंतुना ब्यूगु खः ।

अथेहे ज्याझ्वलय् ज्यापू समाजं यलया पीगू त्वाः मध्येया दकलय् थकालीम्ह ९५दँया आपुलाल अवोले, कलाकार भाइराजा महर्जन, हिरा व्यवसायी बाबुराजा महर्जन नापं थुगुसीया एसएलसीलय् दकल उत्कृष्त ल्याः हःपिं यलया स्वम्ह ज्यापू मिजं व मिसा विद्यार्थीतय् नं हंगु खः ।

More Stories Like this