अनमिनया पक्षय् अमेरिका
शान्ति सम्झौता पूर्ण रुपं पालना यायेमाः : डिलिसी
येँ (सन्ध्या टाइम्स)/नेपाः वयाच्वंगु संयुक्त राष्ट्र संघया मिशन अनमिनं याइगु अनुगमनकारी ज्याय् ताःई अलमल मयायेत अमेरिकां इनाप याःगु दु ।
नेपाःया निंतिं अमेरिकी राजदूत स्कट एच. डिलिसीं थौं शुक्रवाः छगू वक्तव्य जारी यासें अनमिनया अनुगमनकारी व मेमेगु भूमिकाय् अलमल मयासे शान्ति सम्झौतायात पूर्ण रुपं पालना यायेमाःगु सुझाव बियादीगु खः ।
म्हिगः तिनि अमेरिकी राजदूत लगायत बेलायत व फ्रान्सया समेत राजदूततय्सं प्रधानमन्त्री माधव नेपाल व माओवादी अध्यक्ष प्रचण्डयात अलग अलग नापलानाः अनमिनया म्याद व उकिया भूमिका बारे सहलह ब्याकूगु खः। म्हिगः जूगु सहलहया हे लिधंसाय् थौं अमेरिकी राजदूतं थ्व वक्तव्य जारी याःगु खः ।
म्हिगः खास यानाः अनमिनया कार्यादेशया भविष्यया बारे सरकार व माओवादीया धारणा थुइकेगु लागिं थःपिंसं उगु सहलह ब्याकागु खः धासें वक्तव्यय् थ्व बारे सहमति मजुइकं नेपालय् अनमिनयात प्रभावकारी रुपं ज्या यायेत असम्भव जुइगु खँ नं धयातःगु दु ।
वक्तव्यय् सरकार व माओवादी दथुइ जूगु शान्ति सम्झौतायात पूर्ण रुपं पालना यायेमाःगु व उकियात लागू यायेगु ज्याय् वइगु छुं नं कथंया पंगःयात संवोधन यानाः चीका यंकेमाःगु खँ नं उकी धयातःगु दु। वक्तव्यय् अनमिनया अनुगमनकारी भूमिकाय् अलमले मजुसे शान्ति सम्झौतायात पूर्ण रुपं पालना यायेत बः बियातःगु दु ।
शान्ति सम्झौताय् अनमिनपाखें माओवादी सेना व नेपाल सेना निगुलिंया अनुगमन याइ धकाः उल्लेल जुयाच्वंगु दु। थौंकन्हय् नेपालय् शान्ति सम्झौताय् अज्याःगु खँ च्वयातःगु दुसां अनमिनयात माओवादी सेनाया जक अनुगमन याकेगु, नेपाली सेनाया अनुगमन याकेगु मखु धइगु खँ पिहा वयाच्वंगु दु। आः अमेरिकारं शान्ति सम्झौताया पूर्ण पालना यायेमाः धाःगु कारणं शान्ति सम्झौता उल्लंघन यानाः अनमिनयात माओवादी सेना छगूया जक अनुगमन याकेगु पाय्छि मजू धइगु अर्थ पिहां वःगु खँ सूत्रं धाःगु दु ।
लिसें अमेरिकाया थ्व वक्तव्यं अनमिनयात नेपालय् अझ नं ज्या याके मानि, लित छ्वये मत्यःनि धइगु हे अर्थ पिहां वइगु खँ नं धाःगु दु। सरकारं अनमिनया म्याद मेगु प्यला जक थपे यायेगु धकाः पौ च्वयाः छ्वयेधुंकूगु दु। माओवादीं धाःसा दछिया माग यानाच्वंगु दु ।
