राष्ट्र संघय् नेपाः बारे कडा प्रस्तुती

नेपालय् शान्ति प्रक्रिया ताःलाकेत वयाच्वंगु राष्ट्र संघीय मिशन अनमिनया प्रमुख करेन लेनग्रेनं राष्ट्र संघय् पेश याःगु नेपाः सम्बन्धी प्रतिवेदन व उकिया लिसलय् नेपालं च्वयाछ्वःगु लिसः अले नेपाःया लिसःया प्रतिवाद यासें हानं माओवादीं च्वयाछ्वःगु मेगु लिसः - थ्व फुक्कया समग्र लिच्वः अन्ततः नेपाःयात अन्तर्राष्ट्रिय ख्यलय् बदनाम यायेत कुगाइगु खँय् शंका मदु। अनमिन प्रमुख लेनग्रेनं राष्ट्र संघय् न्ह्यब्वःगु नेपाः सम्बन्धी प्रतिवेदन तसकं कडा दु। उकिं नेपाः व राष्ट्र संघ दथुइ हे मनमुताव ब्वलंकीगु खतरा दु। राष्ट्र संघ अन्तर्गत शान्ति सेना जुयाः विश्वन्यंकं थ्यनाच्वंगु नेपाली सेनां थौं राष्ट्र संघया हे विरुद्ध न्ह्याकूगु गतिविधिं भविष्यय् राष्ट्र संघं नेपाःयात स्वइगु मिखा पाइगु स्थिति नं वयेफु ।

अनमिनपाखें नेपाःया बारे राष्ट्र संघय् गुगु प्रतिवेदन न्ह्यब्वल, थुकिं नेपाःया छबी बांमलाकीगु निश्चित दु। अले उकियात कयाः रक्षा मन्त्रीं गुगु ढंगं न्ववाना हल, उकिं थप विषया ज्या याइगु नं निश्चित हे खः। अनमिनया प्रतिवेदन बारे सरकारं तत्काल माओवादीलिसे सल्लाह यानाः गय् यानाः लिसः च्वयेगु धकाः बिचाः ब्याकेमाःथाय् थः याकःचां लिसः च्वयाछ्वःगु व सरकारया उगु लिच्वःप्रति थःपिनिगु सहमति मदु धकाः माओवादीं हानं मेगु लिसः च्वयाछ्वःगुलिं थुकिं संसार न्हीकेगु ज्या जूवंगु दु। लिसें नेपाः सरकारयात मछिंगु ध्याकुनय् नं लाका बिउगु दु। कुटनीतिक मर्यादा धइगु हे मथूपिं नेपाःया मन्त्रीतय्सं अनमिन विरुद्ध लाक्वथाक्व न्ववाःगुलिं राष्ट्र संघलिसे जानाः यायेमाःगु मेमेगु ज्या नं प्रभावित जू वनीगु खँय् बिचाः यायेमाः ।

More Stories Like this