सरकार युद्धपाखे : माओवादी

सरकारया कुंखिसें राष्ट्र संघयात माओवादीया पौ

येँ (सन्ध्या टाइम्स)/वर्तमान सरकारं शान्ति सम्झौतायात त्वाःथलाः देशय् हानं युद्ध शुरु यायेत्यंगु आशंका एकीकृत माओवादीं याना हःगु दु। माओवादी अध्यक्ष प्रचण्डं सरकार देशय् युद्ध यायेगुपाखे न्ह्याः वनाच्वंगु खँ धयादीगु दु।
थौं सुथय् माओवादी अध्यक्ष प्रचण्डं नयाँ बजारया थःगु हे छेँय् बेलायतया न्हूम्ह राजदूत जोम टक्नट, फ्रान्सया राजदूत गिल्स अनरी गराउत व अमेरिकी राजदूत स्कट एच डेलिसीयात मंकाः रुपं नापलानाः सहलह ब्याकेगु झ्वलय् थ्व आशंका प्वंकादीगु खः। थुपिं राष्ट्रत संयुक्त राष्ट्र संघ सुरक्षा परिषद स्थायी समितिया दुजः देय्त खः ।

संयुक्त राष्ट्रसंघया राजनीतिक अधिकारीतलिसे सहलह ब्याकेगु झ्वलय् अध्यक्ष प्रचण्डं विस्तृत शान्ति सम्झौताया अःखः सरकारं संयुक्त राष्ट्रसंघीय मिसन अनमिनया कार्यादेश हिलेत्यंगु दावी नं यानादिल। वय्कःपिनि दथुइ देय्या वर्तमान राजनीतिक अवस्था, संविधान निर्माण नापं थीथी विषयय् नं सहलह जूगु खः।
थ्वहे दथुइ राष्ट्रसंघीय मिसन अनमिनया कार्यावधि थपे यायेगु बारे सरकारं राष्ट्र संघयात च्वया छ्वःगु पौ प्रति असहमति प्वंकुसें माओवादीं थौं राष्ट्रसंघ सुरक्षा परिषदयात हानं मेगु पौ च्वया छ्वःगु दु। थःपिंलिसे छुं सल्लाह हे मयासे सरकारं अज्याःगु पौ छ्वःगु खः धासें माओवादीं अनमिनया कार्यादेश व समयावधि बारे ब्यागलं कथंया धारणा उगु पती च्वया छ्वःगु खँ सीदुगु दु ।

माओवादी न्वकु नारायणकाजी श्रेष्ठ प्रकाशं कनादी कथं न्हापा हे कार्यादेश कथं ज्या यायेगु व खुलाया निंतिं म्याद थप यायेत राष्ट्रसंघया महासचिव वानकी मुनयात पौ छ्वयेधुंकूगु खः। माअवादीं छ्वःगु पतिइ माओवादी सेना व ल्वाभः जक अनुगमन याकेगु निंतिं अनमिनया म्याद थप यायेगु कुतः याःगु धइगु शान्ति सम्झौता व शान्ति प्रक्रिया सम्बन्धि सहमतिया अःखः खः धकाः न्ह्यथनातःगु दु। प्रचण्डं अनमिनया नेपालय् च्वंगु ज्याकूया प्रतिनिधियात नापलानाः सुरक्षा परिषदया नितिं धकाः उगु पौ छ्वःगु खः ।

माओवादी बैठक स्थगित
येँ (सन्ध्या टाइम्स)/एकीकृत माओवादीया थनिंनिसें च्वनेगु धयातःगु केन्द्रीय कमिटीया बैठक स्थगित याःगु दु। नेतातय्गु तयारी मगाःगुलिं थौंया बैठक स्थगित याःगु खः। थ्व बैठक कन्हय् च्वनी धाःगु दु ।

उखे एमालेया थौं च्वनीगु धाःगु पोलिटब्यूरोया बैठक नं अन्तिम इलय् वयाः स्थगित जूगु दु। महासचिव ईश्वर पोखरेल म्हं मफुगुलिं बैठक स्थगित याःगु खँ धाःगु दु ।