सभासद्तपाखें जूगु मर्यादाहिन ज्या

संविधान दयेकि धकाः जनतां त्याका छ्वःपिं सभासद्त धमाधम अनेक काण्डय् लानाः प्रहरी हिरासतय् च्वं वनेमाःगु खनाः न्हूगु नेपाःया म्हगस खंकाच्वंपिं नेपाःमित थारान्हूगु दु। गुलिं सभासद्त घूस नःगु काण्डय्, गुलिं घूस नकूगु काण्डय् लानाच्वंगु समाचारत पिहां वयाच्वंगु दु। वय्कःपिनिगु थ्व ज्यां जनतायात निराश याना बीगुया नापं संविधानसभाया गरिमायात नं पातालय् थ्यंका बीगु उतिकं खतरा दु। गुलिखे इमान्दार व नैतिकवोध दुपिं सभासदतय्सं ला इलय् संविधान दयेके मफुगु न्हिनिसें हे थःगु सभासद्या लोगो सुचुकाः न्यासि जुइगु ज्या शुरु यायेधुंकूगु दु। इलय् संविधान मदयेकू व ६०१ म्ह मछि सभासद्त तयाः राष्ट्रया धुकू फुकः वल धकाः अथें हे नं सभासद्त जनताया दथुइ आलोचित जुयाच्वंगु खः। उकिसनं वय्कःपिंपाखें थुज्वःगु ज्याखँत नं जुइबलय् सभासद् धइपिं थप घृणाया पात्र जू मवनी धकाः धायेफुगु अवस्था मदु। राजनीतिक नेतातय्सं तये मफुगु संसदया मर्यादा सभासद्तय्सं जूसां तये माःगु थौंया इलय् वय्कःपिं गनं 'जि सभासद्' धकाः फुर्ति क्यं वनेगु, गनं जू म्हितेथाय् सहभागी जूवनेगु ज्यां वय्कःपिं प्रति जनताया आस्था पूर्ण रुपं ध्वस्त जुइगु खतरा दु। सभासद् प्रति जनताया आस्था कुतुं वनीगु धइगु संविधानसभा व उकिं संविधान दयेकी धइगु विश्वासय् समेत आघात लाइगु खः। अथे नं राजनीतिक पार्टीतय्सं सभासद्तय्त थःपिंसं धाःथाय् हस्ताक्षर याइपिं रबर स्टाय्म्प जक दयेका तःगु दु। सभासद्तय्सं थःपिनि बौद्धिकता ब्वयाः व स्तरं थहां वयाः क्यनेगु ई नं वास्तवय् थ्वहे खः। थुकिं वय्कःपिं व देशं नं लबः काये फइ ।

More Stories Like this