बस कुतुंवनाः १५ म्ह बेपत्ता
स्वम्ह लाल कयाः बचे जुल
येँ(सन्ध्या टाइम्स)/सिन्धुपाल्चोकया गाति गाविस लागाय् थौं सुथय् छगः यात्रुवाहक बस खुसिइ कुतुंवनाः १५ म्ह यात्रु बेपत्ता जूगु दु ।
सुथय् बा. २ ख ४०१३ नम्बरया यात्रुबाहक बस भोटेकोसी खुसिइ कुतुंवंगु खः। उगु बस गाति गाविस वडा नं. ९या ढुंगाखानी धइगु थासं थ्यंमथ्यं १०० मिटर क्वय् खुसिइ कुतुंवनाः दुर्घटना जूगु खः ।
सिन्धुपाल्चोकया तातोपानी लागां बाह्रबिसे वनाच्वंगु उगु यात्रुबाहक बस थौं सुथय् अथे हे सवा १० बजे खुसिइ कुतुंवंगु खँ धाःगु दु। दुर्घटना जूगु बसय् मुक्कं झिंच्याम्ह यात्रु दुगु खः ।
झिंच्याम्ह मध्य बसया चालक विक्रम शाक्य, सहचालक व छम्ह यात्रु नापं स्वम्ह लाल कयाः बचे जुइत ताःलाःगु खँ प्रहरीं धाःगु दु। बस नापं खुसिइ कुतुंवंपिं मेपिं झिंन्याम्ह यात्रुतय्त जीवित हे उद्धार याये फइगु सम्भावना म्हो जक दुगु खँ नं प्रहरीं धाःगु दु ।
खुसिइ बस कुतुंवनाः सीपिनिगु शव बार्हबिसे बजार तक चुइका हयाच्वंगु दु धकाः नं अन च्वंपिं प्रत्यक्षदर्शीतय्सं जानकारी बिउगु दु। उगु दुर्घटना जुइवं इलाका प्रहरी ज्याकू बाह्रेबिसे, सीमा सुरक्षा बलया सशस्त्र प्रहरी व स्थानीयवासीतय्सं उद्धार यानाच्वंगु दु ।
इलाका प्रहरी ज्याकू बाह्रबिसेपाखें प्रहरी निरीक्षक हेरम्ब शर्माया नेतृत्वय् प्रहरीत वनाः अन उद्धार यानाच्वंगु दु।
खुसि तसकं बाः वयाच्वंगुलिं उद्धार यायेत थाकुयाच्वंगु खँ नं प्रहरीं धाःगु दु। घटनास्थलं निम्हेसिया सीम्ह लुयावःगु दुसा इमिगु सनाखत जूगु मदुनि धकाः नं प्रहरीं धाःगु दु ।
