टेपया सत्यता सुनां पुष्टि यायेगु?

माओवादीया प्रवक्ता कृष्णबहादुर महरां छम्ह चिनियाँ अधिकारीलिसे फोनय् स्वापू तयाः सभासद्त न्यायेगु लागिं ५० करोड तका दां माग यात धकाः पिहां वःगु अडियो टेप बजारय् चर्चाया विषय जुयाच्वंगु दु। खतुं थ्व टेपं चीन व माओवादीया विषयय् शंका पिकया बिउगु खःसां सञ्चार माध्यमय् उगु टेप उपलब्ध याःगु निकाय धाःसा भारतीय दूतावास खः धइगु खँ पिहां वःगुलिं थुकी भारतया नां नं ल्वाकज्याः वःगु दु ।

बजारय् पिहां वःगु टेप यदि धाथें खःसा थ्व निश्चय नं गम्भीर विषय खः। नेपाःया मामिलाय् चिनियाँ हस्तक्षेपया थ्व नग्न दसि जुइ। तर थ्व उपलब्ध याःम्ह भारतीय राजदूतावास खः धइगु खँ पिहां वःगुलिं स्पष्टीकरण बीगु पाः आः भारतीय दूतावासया नं जू वःगु दु ।

सार्वजनिक जूगु टेप अतिकं शंकास्पद खनेदु। छाय्धाःसां उकी संवाद जुयाच्वंगु खँ दु तर सु मनूया गुलि नम्बर टेलिफोनं फोन याना हःगु धइगु खँ धाःसा धाःगु मदु। टेपया विवाद पिहां वःगुलिं उगु टेपया विवरण प्रकाशित याःगु छुं पत्रिकातय्सं टेपया सत्यता पुष्टि यायेत सरकारं छानबिन यायेमाः धयाहःगु दु। तर थ्व सत्यता पुष्टि यायेगु ज्या सरकारया मखु, सुनां प्रकाशन/प्रशारण याःगु खः उमिगु हे खः। छु उमिसं सत्यता हे पुष्टि मजूगु खँ प्रकाशन/प्रशारण याःगु खः? थज्याःगु संवेदनशील मामिलाय् अथे पुष्टि हे मजूगु सामग्री पित बी जिउ? छु थ्वहे खः ला उमिगु पत्रकारिता? माओवादी व चीनं ला थ्व थःपिनिगु टेप मखु धकाः धाये हे धुंकल। आः खः धकाः प्रमाणित यायेगु ज्या सम्बन्धित सञ्चार माध्यमतय्गु खः। उकी सरकारयात साले माःगु आवश्यकता मदु ।

More Stories Like this