थौं पंचदान

लव कर्माचार्य

दछिया छक्वः पालंपाः वयाच्वनीगु थीथी नखःचखः तजिलजि पर्व मध्ये पञ्चदान पर्व नं छगू खः। थ्व छगू बौद्ध पर्व खः। दछिया निगू पञ्चदान न्यायेकीगु चलन दु। छगू यल पञ्चदान, थ्व अष्टमि कुन्हु लानाच्वनीसा येँ व ख्वपया पञ्चदान थौं गुंलागा तृयोदशी कुन्हु लाइ ।

दछिया शुद्धि व बुद्धि अर्थात् शुक्ल पक्ष व कृष्ण पक्ष यानाः थज्याःगु तृयोदशी तिथि नीप्यंगू दयाच्वनी। उपिं मध्ये थ्व भाद्र कृष्ण गुंलागाया तृयोदशी कुन्हु हे पञ्चदान पर्व लानाच्वनी। छुं जुयाः तृयोदशी तिथि टुट जूसा छन्हु न्ह्यः द्वादशि थिति कुन्हु थ्व पञ्चदान पर्व लाइ। अथेसां कन्हय्या चतुर्दशी तिथि टुट जूसा थ्वकुन्हु पञ्चदान पर्व कुन्हु जुगः चःह्रे जूवइ ।

जुगः चःह्रे धइगु जूग फेरे जुइगु न्हि खः। दछि दछिया स्वसः व न्यय्प्यंगू तिथिइ प्यंगू जुग फेरे जुयाच्वनी। सत्य जूग कछलाथ्व कठमाण्ड युगादी नवमि कुन्हु द्वापर जूग सिल्लागा द्वादशि कुन्हु त्रेता जूग बछलाथ्व अक्षय तृतीया कुन्हु कलि जूग थ्व कन्हय्या चःह्रेकुन्हु जुइ। छगू सृष्टिया छगू कल्प जुइसा छगू कल्पय् च्वय्या प्यंगू जुग न्ह्यानाच्वनी। थ्व पञ्चदान पर्व लिक्क छन्हु छन्हु पाःगुलिं पञ्चदान चःह्रेयात चतुदर्शि तिथि नं धाइ।
कृष्णाष्टमि छवाः लिपा कृष्णाष्टमि लिउ व चथाः चखःया छवाः न्हापा कुश अष्टमि निन्हु न्ह्यः थ्व पञ्चदान पर्व न्ह्यानाच्वनी। आः थ्व पञ्चदान पर्वया झ्वलय् वंगु गुन्हिपुन्हि न्ह्यः बाहाबहिली दिपंकर बहिद्यः, थीथी मेमेपिं द्यःपिं व पौभाः क्वय् खाय् तइ। कृष्णाष्टमिया कृष्ण द्यः ब्वये थें पञ्चदान पर्व छन्हु न्ह्यः बहा बहिली पञ्चदान द्यः पौभाः किपा ब्वयेगु व खायेगु ज्या जुयाच्वनी। छेँछेँय् पञ्चदान निन्हु न्ह्यः थःथःगु वश्त्र सफा जुयाः छेँया मातं च्वत, बैगः, सौ सिउचां च्वखो याइ। द्यःयात छायेत बूगु अन्न, खीर-तसमि, पकवान मरि, स्वारि, मालपुवा आदि तयार यानाच्वनी ।

थ्व पञ्चदान पर्वकुन्हु सुथय् न्हापां स्वयम्भू महाचैत्यय् पञ्चदान पर्वया झ्वलय् पूजा यानाः थीथी वस्तु छायेकथं बौद्ध भक्तजनपिं थ्यनाच्वनी। थःथःगु बहाः बहिली बुद्धाचार्य व बज्राचार्यपिनि पञ्चदान पूजा व पञ्चदान न्ह्यानाच्वनी। सुथय् अथेहे ११ ताः ईनिसें १२ ताः ई तक मिजं थकालिंनिसें मिजं क्वकाली तक बहाः चाःहिलाः न्यंकं पञ्चदान कायेगु ज्या न्ह्यानाच्वनी। अथेहे मिसा थकालि नकिंनिसें मिसा क्वकालि नकिं तकं सिन्हः तिकु तिकुं स्वां छुकु छुकुं दक्षिणा, थीथी वस्तु, वा, जाकि आदि पञ्चदान यानाः थ्व पर्व न्ह्यानाच्वनी ।

येँ नगरया बहाः धायेबलय् थथे दु - क्वहिति बहाः, खुसि बहाः, यट्खा बहाः, इतुंबहाः, असं बहाः, दगु बहाः, जमः बहाः, तक्ष बहाः, जन बहाः, मखं बहाः, नःघः बहाः, श्रीघः बहाः, ओमबहाः, लगं बहाः, तेबहाः व तःबहाः आदि। न्ह्यखा छेँनं थहां वनाः पञ्चरां काये बी धुनेवं तुचा कौला नं याका हयेगु चलन दु। थ्व पञ्चदान कुन्हु थःगु इच्छा कथं पञ्चदान न्यायेकीपिं नं दयेफु। पञ्चदान न्यायेकीम्हेसिया छेँय् दबू थें ग्वयाः थीथी ज्वलं दान याइ। वकुन्हु अन वक्वसित पञ्चदान बियाः विदा बिया छ्वइगु चलन दु।
उगु पञ्चदान नापं गुंला बाजं नं थानाः थ्व पञ्चदान पर्व न्ह्यानाच्वनी। दानशाला दयेकाः सुथंनिसें बान्हि ई तक पञ्चदान पर्व न्ह्यानाच्वनी ।

थथे हे ख्वपय् नं थीथी बहाः बही चाःहिलाः पञ्चदान पर्व न्ह्यानाच्वनी। थ्व न्हि कुन्हु गुंपुन्हिया क्वाति त्वने थें यानाः हिन्दू धर्मावलम्बिपिनि लखय् मफ्वसे अथें क्वाति दयेकाः त्वनी। अथे गंक हे क्वाति त्वनीगु जुयाः थुकियात गं क्वाति नखः नं धाइपिं दु ।

येँय् ला आपालं थासय् पञ्चदान कुन्हु पञ्चदान बीमाः धकाः गुथि हे स्वनातःगु नं खनेदु। अज्याःगु गुथि दुपिंसं दानशाला दयेकाः, ब्वः व बौद्ध पौभाः ब्वयाः वक्वसित पंचदान बीगु याइ। थ्व वास्तवय् दानया महत्व बारे सीके थुइकेत बीत न्यायेकातःगु नखः खः ।

More Stories Like this