'चक्रब्युहपाखें निकासया निंतिं २० गते दुने ठोस निर्णय'
येँ (सन्ध्या टाइम्स)/एकीकृत माओवादीया अध्यक्ष प्रचण्डं देय्यात चत्रब्युहपाखें मुक्त यायेगु लागिं थःपिनि पार्टीपाखें वइगु २० गतेया दुने ठोस निर्णय यायेगु जुइ धयादीगु दु।
प्रधानमन्त्रीया उम्मेदवार तकं जुयादीम्ह अध्यक्ष प्रचण्डं थौं सुथय् संसदीय मामिला पत्रकार समाजलिसे खँल्हासें थ्व खँ धयादीगु खः ।
थःगु छेँय् थःत नापलाः वःपिं समाजया पत्रकारतलिसे खँ ल्हासें वय्कलं माओवादी पार्टीपाखें वइगु २० गते ब्यवस्थापिका संसदय् खुक्वःगु प्रधानमन्त्रीया चुनाव जूवनाच्वंगु जुयाः उकुन्हुया दुने हे थःपिंसं राजनीतिक गतिरोध अन्त्यया निंतिं ठोस निर्णय यायेगु जुइ धयादीगु खः ।
संविधान निर्माणया ज्या मजूगु नापं तःक्वःमछि प्रधानमन्त्रीया चुनाव जुयाच्वंगु खँयात कयाः संविधानसभाय् दकलय् अप्वः योगदान याःगु पार्टीया नातां नं थःपिं दकलय् अप्वः चिन्तित जुयागु दु धासें वय्कलं आःया राजनीतिक गतिरोध अन्त्यया निंतिं थःपिं हे जिम्मेवार जुयाः न्ह्याः वनेगु जुइ धयादिल ।
राजनीतिक गतिरोध अन्त्य मजूगु खँय् माओवादी दोषी मखु धासें अध्यक्ष प्रचण्डं प्रधानमन्त्रीया उम्मेदवारी लित कायेत थःपिं तयार दुगु खँ नं स्पष्ट यानादिल ।
वय्कलं धयादिल, 'दुई तिहाई बहुमत न्ह्याम्हेस्यां हःसां थःगु नां लित कयाः वयात समर्थन यायेत जिपिं तयार दु।'
वइगु २० गते व्यवस्थापिका संसदय् प्रधानमन्त्रीया निंतिं माओवादी अध्यक्ष प्रचण्ड व नेपाली कांग्रेस संसदीय दलया नेता रामचन्द्र पौडेल दथुइ हानं धेंधेंबल्लाः जुइत्यंगु दु। प्रधानमन्त्री ल्ययेत वय्कःपिनि दथुइ जुइत्यंगु थ्व खुक्वःगु मतदान खः ।
