नेवाः फिल्मं त्याकूगु उत्कृष्टताया एवार्ड

थुगुसी छक्वलं निगू दँया लागिं बिउगु राष्ट्रिय फिल्म सिरपाः ज्याझ्वलय् आदिवासी जनजातिया फिल्मपाखे निगुलिं दँय् नेवाः फिल्मं हे सर्वोत्कृष्ट फिल्मया त्याकूगु दु। फिल्म जक मखु निगुलिं फिल्मया निर्देशक व निगुलिं फिल्मया अभिनेत्रीं नं सर्वोत्कृष्ट सिरपाः त्याकाः नेवाः फिल्म निर्माण ज्याया गौरव थकया बिउगु दु। थुकिया लागिं निगुलिं नेवाः फिल्मया निर्माता व सम्पूर्ण फिल्म युनिटयात बधाई बीमाः ।

खतुं नेपालभाषां फिल्म निर्माणया ज्या शुरु जूगु करिब निगू दशक हे तिनि दत। अतिकं सीमित स्रोत साधन व म्होचा दर्शकया दथुइ फिल्म दयेकेमाःगु जूगुलिं नेवाः फिल्म निर्माणया पलाः खस भाषाया तुलनाय् गतिमान मजू। अथे खःसां थुकिं यानाच्वंगु विकासया क्रम धाःसा उत्साहवर्धक हे धायेमाः। पुलांपिं ख्यालः व दबू प्याखंया कलाकारतय्सं शुरु याःगु नेवाः फिल्म निर्माणया ज्याय् थौंकन्हय् आपालं न्हूपिं कलाकार व ल्याय्म्ह पुस्ता संलग्न जुयाच्वंगु दु ।

फिल्म मनोरंजनया विषय जक मखु। नेपालभाषायात आःया युगय् नं जीवन्त याना तयेगु खःसा फिल्म हे छगू जक आशा यायेबहःगु ख्यः खः। न्हूगु पुस्तायात भाषा व जातिया म्हसीका आः फिल्मं हे जक बी फइ। उकिं थौं नेवाः फिल्म निर्माणया ख्यलय् गुगु कलाकर्मीत लगे जुयाच्वंगु खः, वय्कःपिंत झीगु भाषा व जाति बचे याइपिं कन्हय्या संवाहक धायेमाः। वय्कःपिंसं यानाच्वंगु ज्या भावुकता जक मखु, कलात्मकताया ल्याखं नं उत्कृष्ट खः धइगु खँ थुगु एवार्डं पुष्टि याना बिल। आः थ्व फिल्म ख्यःयात 'फिल्म उद्योग' दयेका यंकेगु झी सकस्यां उद्देश्य जुइमाः। थुकिं हे नेवाः फिल्म व नेवाः भाषा नितांयात म्वाकी ।

More Stories Like this