थौं कृष्ण बूगु कृष्णाष्टमि

लव कर्माचार्य

गुंलां क्वाति पुन्हिया छवाः लिपा वइगु पर्व कृष्णाष्टमि खः। नागपञ्चमि धुनेवं बाःछि मपाक वइगु निगूगु पर्व कृष्णाष्टमिया कृष्ण पूजा खः। गुंपुन्हि लिउ ख्वप व येँया पञ्जरां न्ह्यः लाइगु थ्व कृष्णाष्टमि थुगुसी इश्वी संवत्या १ तारेख कुन्हु लानाच्वंगु दु ।

चन्द्रमासया तिथि कथं भाद्र कृष्ण नेपाल संवत् कथ गुंला अष्टमि कुन्हु थ्व पर्व लाः वइ। थ्व कृष्ण जयन्ती पर्व नं खः। चन्द्रमासय् तिमिला व खिमिला यानाः नीप्यंगू अष्टमि वइगु मध्ये थौंया कृष्णाष्टमि तःधंगु पर्व खः। थ्व कृष्ण बूगु जन्माष्टमि खः ।

कृष्ण बूगु चायात संस्कृत भासं अहोरात्रि धाइ। दछिया प्यंगू अहोरात्रि दइ। मोहनिया गुन्हु चायात नवरात्रि, स्वन्तिया लक्ष्मी पूजाया चायात सुखरात्रि, सिलाचःर्‍हेया चायात शिवरात्रि व कृष्णाष्टमिया चायात अहोरात्रि धाइ।
प्रसिद्ध च्याम्ह महापुरुष मध्ये रामया लिउ कृष्ण निम्हम्ह पुरुष खः। भगवान विष्णुया च्यागूगु अवतार कथं द्वापर युगय् कृष्णया जन्म जूगु खः। विष्णुया नीलवर्ण वा नारायणया हरित वर्ण जूगुलिं कृष्णयात विष्णुया अवतार कथं नीलवर्ण वँचुगु उनयाम्ह खः धाइ। अथेला कृष्ण सन्ध्या ई कथं सनिलया श्यामवर्ण कथं व हाकु उन कथं कृष्ण वर्ण जूगुलिं कृष्णयात श्याम वा श्यामा नं धाइ।
कृष्णयात थीथी नामं पुकार यानाच्वनी। बान्हि खिउँबलय् बूम्ह जुयाः कृष्ण, निभाः लुकुंबिनाः खिउँ ख्वाः कथं श्याम, मचाया नामं मुकुन्द, बालमुकुन्द, यः कथं लाला, साजवाः कथं गोपाल, धौ खुया नइम्ह कथं माखन चोर, साजवाः गोबिन्द, सापू गोपाल, कन्हैया, मुरारी, मोह याइम्ह मोहन, मनमोह याइम्ह मदन, वाउँ उनम्ह हरि, बाँसुरी पुइम्ह मुरलीधर वा बंशीधर, गिरिधर, केशव, माधव, जनार्दन, नरोत्तम, पुरुषोत्तम, यदु बंशया यदु नन्दन, देवकी आकास, देवकी नन्दन आदि आदि। अथे हे श्रीकृष्ण, राधाकृष्ण, गोपीकृष्ण, बालकृष्ण, हरेकृष्ण, हरिकृष्ण, ओमकृष्ण आदि आदि नामं नं सःतू ।

कृष्णया अबु वशुदेव खःसा मांपिं निम्ह दु। न्ह्यथु रोहिणीपुत्र बलराम, लिथुम्ह देवकीपुत्र कृष्ण। बशुदेवया काय जूगुलिं कृष्णयात बाशुदेव नं धाः। कृष्णया अनेक चरित्र व लीला दु। चा नःम्ह धकाः म्हुतु फायेका स्वतं कृष्णया म्हुतु दुने पृथ्वी क्यना बिल। उगलय् चिनाबिल, उगः हे साला यंकाः खिपः चफुइफुम्ह कृष्णयात कंशया सेनां मि तया बिल। तर बाँसुरीया धुनं मि स्याना बिल। च्वला पतिंचां पहाड ल्ह्वनाः दक्वसित कुसां कुइ थें कुइकाः वां बचे याना बिल। कृष्ण दक्व गोपिनीपिंत छम्ह छम्ह कृष्ण थ्याके फुम्ह। कृष्णया १६०० म्ह गोपीनी दु धाइ। तर उकी स्वम्ह हे जक कलाः खः। रुक्मनी, सत्यभामा व जाम्बुवती। अथेला वया मतिनापिं जवय् राधा व खवय् राधिका न्ह्याबलें च्वं वयाच्वनी। कृष्णं बाँसुरी जक पुयाः फुक्क गोपीनीतय्त मोहित यायेफुम्ह खः ।

कृष्णं थःत विषालु दुरु त्वंकाः स्यायेत वःम्ह पाजु कंशया केहेँ पुतनायात दुरु त्वँत्वं हे प्राण कया बिल। थः मांबौया शत्रु पाजु कंशयात मुक्का जक नकाः याना बिल। महाभारतय् थःत सछि व च्याकः ब्वः बिउम्ह शिशुपालयात सुदर्शन चक्र प्रहार यानाः स्याना बिल।
कृष्णं महाभारतय् भिंद्यः स्याये फुम्ह जरासंधयात सितु घाँय् फानाः जवं खवय् खवं जवय् संकेत बियाः भीमयात थ्वहे कथं स्यायेगु इशारा यात। दुर्योधनया लिउने कृष्ण च्वनाः भीमयात खम्पाय् गदां दाया बिउ धकाः छुमां बियाः स्याके बिल। धृतराष्ट्रयाथाय् भीमयात मछ्वसे नँयाम्ह भीमयात छ्वयाः काचाकुचु याके बिल। महाभारत युद्धय् किसि सीगु खँयात अश्वत्थामा सित धकाः हल्ला यानाः कौरव सेनाया मनोबल क्वकया बिल। थः दाजुकिजापिंलिसे युद्ध याये मखु धकाः वाण त्वःतूम्ह अर्जुनयात कृष्णं हे विश्वरुप क्यनाः युद्ध यायेत उक्से यात ।

थौं कृष्णाष्टमि कुन्हु यलय् ला कृष्ण देगलय् सुथंनिसें बहनी थ्यंकं भक्तजनपिं मेला कथं थ्यनाच्वनी। यलय् मतयाः वने थें कृष्ण पुजा वनाः यलय् दक्व कृष्णद्यः थिउ वनीगु चलन दु ।

थौंया न्हि गुलिं अप्सं च्वनाः कृष्णद्यः पूजा याइसा गुम्हं जाग्राम च्वनी। गनं गनं कृष्ण द्यःया धलं दनाः कृष्ण पूजा जुयाच्वनी। फल्चाय् ब्वयातःपिं कृष्ण द्यःया पूजा न्ह्यानाच्वनी। थौंया न्हि कृष्णया यःगु म्हय्खापा मियाच्वनीसा कृष्ण बूगु चा कथं चि, इमू, पालु, चाकु छायाः प्रसाद कयाच्वनी। चुक पतिं ब्वया तइपिं कृष्णया किपा मध्ये कृष्ण चरित्र व महाभारतया किपा अति आकर्षक जुइ ।

More Stories Like this